Hatutan.com, (27 Juñu 2023), Díli—Polisia Nasionál Timor-Leste (PNTL) liuhosi Unidade Patrullamentu Fronteira (UPF) durante vizilánsia iha fronteira Timor-Leste ho Repúblika Indonézia (RI), halo apreensaun bá minarai litru 25 ho massa hamutuk 49, besik tasi-ibun, área Palaka, Postu Administrativu Atabae, Munisipiu Bobonaro.
UPF ninia atuasaun ne’e akontese iha Domingu (18/06/2023) madrugada, Olt, tanba sidadaun sira lori hosi rai viziñu, atu hatama mai fa’an fali iha rai-laran, liuhosi dalan ne’ebé ilegál.
Lee Mós: Timor Leste Gagalkan Pengiriman 6,8 Ton Pupuk Ilegal
Segundu Komandante UPF, Superintendente Asistente, Carlos Monis Maia hateten, kazu krime sira ne’ebé durante rejistadu ida de’it maka ema tiru Timoroan ida ho kilat anin iha área fronteira, Postu Administrativu Tilomar, Munisipiu Covalima.
Maibé, kazu krime sira seluk liu-liu kona-bá kontra bandu nian akontese bebeik iha liña fronteira. Kontra bandu ne’e maka, primeiru, ultrapasa liña fronteira illegal ne’ebé mak halo hosi sidadaun TL nomós Indonézia.
Seluk fali maka, kazu kontra-bandu halo atividade negósiu illegal hanesan minarai, gazólina, gazóel, hatama no hasai animál sira hanesan fahi, manu, no buat sira seluk ne’ebé mak sempre akontese iha liña fronteira.
“Kazu sira ne’e kuandu ita hasoru, ita prende, ita halo prosesu hanesan baibain ita entrega bá iha Ministériu Públiku hafoin sira kontinua halo prosesu. Númeru serteza ha’u la dekór, mais ezemplu, iha Domingu semana kotuk ita prende minarai masa 25 litru, 49 litru iha área tasi-ibun Palaka ninian,” Superintendente Asistente Carlos Monis Maia informa iha Kuartél Jerál PNTL, Caicoli, Dili, Tersa (27/06/2023).
Komandante Carlos Maia hatutan, kazu sira ne’ebé mak hanesan, akontese tán ohin dadeer iha área fronteira entre Postu Administrativu Tilomar, Covalima, membru UPF sira halo apreensaun tán bá sigaru ho marka oioin hatama hosi Indonézia.
“Depois, ohin dadeer, iha área Tilomar ninian iha Kotaba, ita prende sigaru Marlboro slop atus-ida (100), nomós sigaru ese iha 19 slop, ho maxu hitu (7). Sasán sira ne’e ita prende, tanba tula iha kareta mikrolete ida, depois sira atu transporte hosi liña fronteira, tama bá iha kota laran,” Segundu komandante UPF, Carlos Maia hateten.
Evidénsia sira ne’e, UPF assegura hotu ona no prosesu investigasaun bá autór sira la’o hela, depois prosesu identifikasaun remata, UPF sei entrega bá iha Ministériu Públiku hodi halo nia prosesu kontinuasaun.
Hatán kona-bá fukun loloos ne’ebé kauza bá atividade ilegál sira ne’e, komandante Carlos dehan, seidauk halo peskiza ruma bá ida ne’e maibé tinan rua resin, nia servisu iha fronteira haree katak, situasaun sira ne’e mosu tanba nesesidade bázika komunidade.
Ida fali, sasán ne’ebé mak baibain sira halo kontra-bandu, ilegál ne’e hosi Indonézia, nia présu ne’e baratu depois kuandu mai sira fa’an iha Timor ho présu ne’ebé aas.
Segundu komandante UPF ne’e informa mós katak, hosi sasán hirak ne’ebé mak sira prende iha duni suspeitu, no barak maka bainhira sira prende, na’in halai tiha, deskoñesidu.
Maski nune’e, UPF kontinua prosesu nafatin hodi entrega bá iha Ministériu Públiku tanba nia mak nu’udár na’in bá asaun penál.
Jornalista: Rogério Pereira Cárceres
