Japaun Preparadu Simu Traballadór Timoroan, Faze Dahuluk Na’in-11

Hatutan.com, (06 Jullu 2023), Díli—Governua Japonés preparadu atu simu traballadór Timoroan no oras ne’e daudaun iha hela preparasaun tékniku ho estajiáriu tékniku ba Timoroan sira ne’ebé iha faze dahuluk simu ema na’in-11.

Ministru Negósiu Estranjeiru no Kooperasaun (MNEK) Japaun, Takei Shunsuke, hasoru-malu ho Prezidente Repúblika (PR), José Ramos-Horta iha iha Palásiu Prezidensiál Nicolau Lobato Bairu-Pité, Kinta (06/07/2023). Foto/Elio dos Santos da Costa.

Ministru Negósiu Estranjeiru no Kooperasaun (MNEK) Japaun, Takei Shunsuke hateten lia hirak ne’e hafoin hasoru-malu ho Prezidente Repúblika (PR), José Ramos-Horta iha iha Palásiu Prezidensiál Nicolau Lobato Bairu-Pité, Kinta (06/07/2023).

Lee Mós: Japaun Oferese Oportunidade bá Timoroan Servisu Iha Área Indústria Agríkola

“Kona-bá programa formasaun tékniku no estajiáriu tékniku ba Timoroan sira ne’ebé atu ba servisu iha Japaun, parte governu Japaun hahú halo preparativu sira atu simu traballadór iha faze dahuluk ne’ebé kompostu hosi ema na’in sanulu resin ida (11), ne’ebé sei ba Japaun hodi hahú tuir formasaun no serbisu iha ne’ebá,” Takei Shunsuke hateten.

Takei Shunsuke konsidera Timor Leste hanesan nasaun mais joven no Governu TL iha serbisu ida ho forma pozitivu tebes atu bele iha kooperasaun bilaterál ne’ebé lori benefísiu ba povu ida-ne’e.

Durante reuniaun ho Prezidente Republika, Takei Shunsuke  hodi povu Japaun nia naran hato’o profunda respeitu ba fortelesimentu relasaun bilaterál entre nasaun rua.

Japaun iha komitmentu bo’ot atu kontinua mantein hodi hametin relasaun bilaterál ho Timor-Leste iha seitór hotu-hotu.

“Japaun ho Timor-Leste hanesan parseiru Importante iha Rejiaun indo Pasífiku ne’ebé kompartilla valores universál hanesan liberdade, demokrasia, direitus umanus, nu’udár Estadu direitu Demokrátiku,” Takei Shunsuke esplika.

Hafoin partisipa iha serimónia posse IX Governu Konstitusional, MNEK Japaun ne’e iha kedan Komunikasaun direta ho Governu foun no ne’e atu demostra de’it Japaun nia komitmentu hodi fó importánsia ba relasaun bilaterál entre Japaun ho Timor-Leste.

Iha okaziaun ne’e, Prezidente Repúblika José Ramos-Horta mós troka ideas ho MNEK Japaun kona-bá oinsa apoiu ne’ebé Japaun oferese ba Timor-Leste iha área seguransa no apoiu formasaun hotu-hotu ne’ebé iha, ho intensaun atu tulun adezaun Timor Leste nian ba ASEAN.  

Jornalista: Vito Salvadór