Membru UEP Na’in-66 Dezloka Bá Munisípiu Sia Tulun Vítima Dezastre Naturál

Hatutan.com, (08 Jullu 2023), Díli—Komandu Polísia Nasionál Timor-Leste (PNTL), deside hodi dezloka membru na’in-66 hosi Unidade Espesiál Polísia (UEP), tun bá terrenu hodi tulun vítima sira mak afetadu hosi dezastre naturál durante loron tolu hahú hosi 03 to’o 05 Jullu iha munisípiu sia (9).

Komandu Polísia Nasionál Timor-Leste (PNTL), deside hodi dezloka membru na’in-66 hosi Unidade Espesiál Polísia (UEP), tun bá terrenu hodi tulun vítima sira mak afetadu hosi dezastre naturál durante loron tolu hahú hosi 03 to’o 05 Jullu iha munisípiu sia (9). Seimónia dezlokasaun ne’e hala’o iha kuartél UEP, Bairru-Pité, Díli, Sábadu (08/07/2023). Foto/Elio dos Santos da Costa.

Reprezentante Komandu Jerál PNTL, komandante operasaun nasionál, Superintendente Xefe Polísia José Soares dehan, komandu laiha kbi’it atu fó apoiu sosiál hanesan hahán ka la’ós ai-han, maibé sempre ho prontidaun atu oferese ninia membru sira, tun bá terrenu, fó apoiu fíziku bá vítima sira, hadi’a sira-ninia uma hela-fatin, bele fila-fali bá normál.

Lee Mós: Dezastre Naturál Estraga Uma 30 Iha Airaca-Lau

“Ohin PNTL dezloka ita-nia efetivus, hosi UEp ho kuantidade 66 bá apoiu iha munisipiu sira ne’ebé mak iha loron rua liubá, hetan dezastre naturais. Membru sira ne’e bá atu fó apoiu atividade sosiál, tanba ita laiha kbi’it sira seluk atu apoia ekipa ne’ebé mak servisu iha terrenu,” José Soares hateten iha kuartél UEP, Bairru-Pité, Díli, Sábadu (08/07/2023).

Komandante José Soares dehan, komandu PNTL hatene katak, maski depois kampaña to’o eleisaun, formasaun governu foun, sira iha situasaun alerta, ne’ebé mak sira esforsa an tomak hodi asegura atividade kampaña no eleisaun Parlamentár to’o formasaun Governu.

Iha situasaun kalamidade ida hanesan ne’e, PNTL prontu nafatin atu bele apoia komunidade iha munisipiu sira.

Membru sira ne’e bá atu serbisu hamutuk ho komandu munisipiu no mós autoridade relevante sira iha munisipiu, atu bele apoiu vítima sira, karik hadi’a sira-nia uma ho saida mak iha, ka apoiu sira Institutu Jestaun Ekipamentu ninian atu bele normaliza fali estrada sira.

Alende ne’e, fó mós apoiu seguransa iha munisipiu sira atu ekipa bele hala’o servisu ho di’ak, liuliu  lori fali komunidade bá iha situasaun normál ninian.

“Kada munisipiu, ita koloka na’in 7 to’o  8. Sexta-feira sira termina sira-nia servisu iha munisipiu,” nia hateten.

Tuir dadus ne’ebé fó sai hosi Autoridade Protesaun Sívil (APC-Sigla Português), katak, dezastre naturál inundasaun no erozaun ne’e, rezulta uma hamutuk 274 mak hetan estragus iha Munisipiu Lautem, Viqueque, Baucau, Manatuto, Manufahi, Ainaro, Covalima, Ermera no Bobonaro.

Jornalista: Rogério Pereira Cárceres