Polísia Kaer Ona Na’in Bá Konta Facebook ‘Jonn Malic’

Hatutan.com, (10 Jullu 2023), Díli—Polísia Nasionál Timor-Leste (PNTL), liuhosi Departamentu Investigasaun Kriminál (DIK) kaer ona sidadaun mane ida ho insiál MJ, tanba deskonfia nu’udár na’in bá ID facebook ‘Jonn Malic’ ne’ebé durante ne’e sempre hasai lia-fuan at ka ‘tolok’ hasoru eis komandante En-Xefe FALINTIL no atuál Primeiru Ministru (PM), José Alexandre Kay Rala Xanana Gusmão, iha média sosiál facebook.

PNTL kaer ona sidadaun mane ida ho insiál MJ, tanba deskonfia nu’udár na’in bá ID facebook ‘Jonn Malic’ ne’ebé durante ne’e sempre hasai lia-fuan at ka ‘tolok’ hasoru eis komandante En-Xefe FALINTIL no atuál Primeiru Ministru (PM), José Alexandre Kay Rala Xanana Gusmão, iha média sosiál facebook, iha ninia rezidénsia priváda iha área Mota-Ki’ik, Suku Hera, Postu Administrativu Cristo Rei, Munisípiu Díli, Segunda (10/07/2023), tuku 08:00 dadeer. Foto/Elio dos Santos da Costa.

Sidadaun mane ne’ebé ho identidade loloos MJ alias Manukai idade 33 ne’e, ekipa investigasaun kriminál PNTL ninian bá foti iha ninia rezidénsia priváda iha área Mota-Ki’ik, Suku Hera, Postu Administrativu Cristo Rei, Munisípiu Díli, Segunda (10/07/2023), tuku 08:00 dadeer.

Lee Mós: Matadalan Mídia Sosiál bá Jornalizmu

Haree bá ‘Jonn Malic’ ninia postajen hotu-hotu ne’ebé kontein liafuan sira ne’ebé ofende tebes líder nasionál Kay Rala Xanana Gusmão ne’e, PNTL liuhosi DIK buka tuir kedan, no ohin konsege bá foti duni iha ninia rezidénsia ka uma-hela fatin, iha área Hera.

Oras-ne’e daudaun, ekipa investigasaun hala’o hela prosesu identifikasaun bá suspeitu MJ iha Kuartél Jerál PNTL Caicoli, liu-liu atu buka hatene kona-bá mensajen tolok sira ne’ebé hakerek iha ID facebook ‘Jonn Malic’ ne’e, ninian duni ka la’ós.

Tuir informasaun ne’ebé Hatutan.com asesu hosi Investigadór sira PNTL nian katak, oras-ne’e mós ekipa kontinua buka no buka tuir hela ID facebook falsu sira mak hanesan ‘Kontra Sira’, inklui seluk tán, tanba durante ne’e sempre hasai liafuan aat hasoru Timoroan ninia lider nasionál sira iha média sosiál facebook.

Jornalista: Rogério Pereira Cárceres