Governu Sei Hametin Programa Importante Ne’ebé Refleta PEDN 2011–2030

Hatutan.com, (12 Jullu 2023), Díli—Governu sei tau prioridade ba programa sira ne’ebé refleta bá Planu Estratéjiku Dezenvolvimentu Nasionál 2011-2030.

Ministru Prezidénsia Konsellu Ministru (MPCM, sigla portugés), Hermenegildo António Cabral Pereira. Foto/Elio dos Santos da Costa.

Ministru Prezidénsia Konsellu Ministru (MPCM, sigla portugés), Hermenegildo António Cabral Pereira hateten programa ne’e sintetiza polítikas públikas prinsipáis ne’ebé atu adopta durante Governu ninia mandatu.

Lee Mós: Breaking News: Tuku 08:15 Ne’e, Xanana Hahú Servisu iha Palásiu Governu

“Objetivu maka hametin no optimiza setores governasaun nian no sira nia rekursu hodi ha-badak dalan atu transforma vizaun Ajenda Dezenvolvimentu Sustentavel 2030 no Planu Estratéjiku Dezenvolvimentu 2011 – 2030 nian hodi sai realidade,” Hermenegildo António Cabral Pereira hateten hafoin sorumutu no aprova Programa Governu Konstitusionál IX iha Palásiu Governu, Kuarta (12/07/2023).

Konsellu Ministru mós delibera hodi aprezenta bá Parlamentu Nasionál Votu Konfiansa ida ba Governu, ne’ebé fundamenta hosi kompromissu ne’ebé firme no determinadu atu implementa ninia programa ho objetivu atu promove dezenvolvimentu, prosperidade no moris di’ak ba sidadauns Timoroan.

Programa ne’e kompoin hosi área prinsipál neen mak hanesan, afirma fil-afali Estadu Direitu Demokrátiku, dezenvolvimentu kapitál sosiál, dezenvolvimentu infraestruturas, dezenvolvimentu ekonomia, konsolidasaun governativa no boa governasaun no kombate hasoru korrupsaun.

Jornalista: Vito Salvadór