Justisa & Krime
Konsellu Superiór Ministériu Públiku Klarifika Notifikasaun bá Jornalista ho Xefe Redasaun Hatutan.com
Hatutan.com, (12 Jullu 2023), Díli– Konsellu Superiór Ministériu Públiku, Kuarta (12/07/2023), distribui klarifikasaun ofisial liuhosi komunikadu imprensa kona-bá prosesu notifikasaun ne’ebé Ministériu Públiku halo hasoru jornalista Rogério Pereira Cárceres ho Xefe Redasaun hosi Mídia online Hatutan.com, Francisco Belo Simões da Costa.
Lee Mós : Xefe Redasaun Hatutan.com Presta Deklarasaun iha MP
Xefe Redasaun Mídia online Hatutan.com, Francisco Belo Simões da Costa, Sesta 23 fulan-Juñu 2023), hale’u tuku 10:00 dadeer OTL, presta deklarasaun iha Ministériu Públiku (MP), hodi kumpre bá notifikasaun komparénsia (Notificação Comparência) hosi Sekretaria Inspesaun Ministériu Públiku (MP) nian.
Prokuradór Jerál Repúblika Alfonzo Lopez. Foto/Elio dos Santos da Costa
Iha Kinta, 22 fulan-Juñu 2023, hale’u tuku 15:00 OTL, Xefe Redasaun Mídia Online Hatutan, Francisco Belo Simões da Costa, ne’ebé nu’udár membru Conselho de Imprensa de Timor Leste, simu notifikasaun MP nian ho númeru referénsia 84/IMP/2023, ne’ebé asina hosi Sekretaria Inspesaun Ministériu Públiku nian, Eliana Flora Pereira.
Notifikasaun ne’e baze bá despaixu hosi Inspetora Ministériu Públiku, Dra. Zélia Trindade, atu rona deklarasaun hosi Xefe Redasaun Hatutan.com, Francisco Belo Simões, relasiona ho notísia Hatutan.com nian, edisaun 19 fulan-Maiu 2023, ho títulu notísia, “Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugal”.
Molok ne’e, iha loron 22 fulan-Juñu 2023, hale’u tuku 10:00 dadeer OTL, jornalista Hatutan.com, Rogério Pereira Cárceres, mós bá presta deklarasaun iha Ministériu Públiku, hodi hatán bá notifikasaun komparénsia (Notificação Comparência) hosi Sekretaria Inspesaun Ministériu Públiku (MP).
Lee Mós : MP Notifika Jornalista Hatutan.com Rogério Pereira Cárceres Hodi Presta Deklarasaun
Tuir mai Hatutan.com publika kompletu konteúdu hosi nota komunikadu imprensa hosi Konsellu Superiór Ministériu Públiku ne’ebé asina hosi Prezidente Konsellu Superiór Ministériu Públiku Alfonso Lopez nu’udár Prokuradór Jerál Repúblika (PGR, sigla portugés).
Fó-sai ona notísia, komentáriu no informasaun sira liuhosi komunikasaun sosiál oioin relasionadu ho inkirisaun ba Srs. Rogério Pereira Cárceres no Francisco Simões Belo da Costa, jornalista no xefe redasaun, hosi Jornál on-line – hatutan.com, iha ámbitu prosesu inkéritu dixiplinár ida, ne’ebé ninia prosedimentu sira la’o hela iha Konsellu Superiór Ministériu Públiku, hodi hamosu dúvida iha opiniaun públiku.
Hodi esklarese opiniaun públiku, atu labele iha tan dúvida, Konsellu Superiór Ministériu Públiku, hafoin reune tiha iha nia sesaun ordinária iha loron-10 fulan-Jullu tinan-2023, delibera, liuhosi unanimidade, informa katak:
- Ministériu Públiku la instaura prosesu-krime ruma hasoru Srs. Rogériu Pereira Cárceres no Francisco Belo Simões da Costa, jornalista no xefe redasaun, hosi Jornál On-line com, no la konstitui sira hanesan arguidu hafoin publikasaun artigu ne’ebé ho títulu “Deskonfia PJR Alfonso Lopez, ho nia Asesór Jurídiku Óscar Tavares Uza osan Estadu halo Viajen Privadu iha Portugal”.
- La eziste iha órgaun ka servisu sira Ministériu Públiku nian kualker prosesu-krime kontra jornalista relasionadu ho ezersísiu sira-nia funsaun sira.
- Liuhosi Deliberasaun n.o 41/KSMP/2023 hosi Konsellu Superiór Ministériu Públiku, loron-29 fulan-Maiu tinan ida ne’e, instaura tiha prosesu inkéritu dixiplinár internu ida, hodi apura responsabilidade funsionáriu no ajente sira Servisu Apoiu Tékniku no Administrativu Prokuradoria-Jerál Repúblika nian relasiona ho divulgasaun públika dokumentu no informasaun ne’ebé protejidu hosi sijilu profisionál, ne’ebé ninia prosedimentu sira la’o hela iha Servisu Inspesaun Ministériu Públiku nian.
- Iha ámbitu hosi prosesu inkéritu dixiplinár ida ne’e, mak halo tiha inkirisaun ba sidadaun sira Rogério Pereira Cárceres no Francisco Belo Simões da Costa ho kualidade hanesan sasin, tanba sira iha koñesimentu kona-ba faktu hirak ne’ebé sai nu’udar objetu ba prosesu inkéritu dixiplinár refere.
- Relasionadu ho notísia sira ne’ebé publika hosi Jornál “Timor Post” no Jornal Independente iha loron-03 fulan-Jullu tinan ida ne’e, atribui tiha ba Prezidente Asosiasaun Jornalista Timor-Lorosa’e (AJTL), Konsellu Superiór Ministériu Públiku esklarese katak Ministériu Públiku laiha kompeténsia legál atu define krime sira, tanba matéria krime sira nu’udar Kompeténsia Parlamentu Nasionál no Governu nian, liuhosi autorizasaun Parlamentu Nasionál.
Sidade Dili, loron-10 fulan-Jullu tinan-2023.
Prezidente Konsellu Superiór Ministériu Públiku,
Alfonso Lopez
Prokuradór-Jerál Repúblika