Governu Sei Tau Orsamentu Bazeia bá Programa

Hatutan.com, (20 Jullu 2023), Díli- Primeiru-Ministru (PM), Kay Rala Xanana Gusmão, afirma polítika IX Governu Konstitusionál nian sei tau orsamentu bazeia bá programa atu lori dezenvolvimentu bá povu.

PM Xanana hasoru malu ho PR José Ramos-Horta, Kinta (20/07/2023). Foto/Elio dos Santos da Costa

Primeiru-Ministru Kay Rala Xanana Gusmão bá jornalista sira iha Palásiu Prezidensiál, Kinta (20/07/2023) hateten, iha loron 01 fulan-Juñu liubá, membru sira IX Governu Konstitusionál simu posse no posse de’it la fó kbiit tomak bá governu atu atua nu’udar governu, kondisaun ida mak governu tenke iha programa bá tinan lima aprovadu.

Tan ne’e, Xanana tenik,  horisehik, Kuarta 19 fulan-Jullu 2023 iha Parlamentu Nasionál aprova tiha ona programa Governu nian ho  unanimidade ne’ebé revela mudansa mentalidade, no mudansa espíritu atu kaer metin no ré-afirma Estadu Direitu Demokrátiku.

Nia afirma primeiru enkontru ofisiál entre Xefe Estadu no Xefe Governu, semana-semana sei hasoru malu  atu informa bá Xefe Estadu programa no lala’ok tomak servisu governu nian.

 Xefe Governu hatutan governu foun tenke haree hahú husi 01 fulan-Jullu to’o 31 fulan-Dezembru tenke iha osan atu finansia atividade balun ne’ebé kontínua, sei kontínua no balun ne’ebé la kontinua hasai tiha.

Saida mak urjente liu halo, saida mak sei bele kontinua tinan sira tuir mai ida ne’e mak planu asaun ba tinan sira tuir mai ne’ebé governu kaer hodi ba halo orsamentu jerál estadu iha tinan 2024.

“Ita nia sistema temi dehan orsamentu bazeia bá programa, se orsamentu bazeia bá programa, iha tinan 2024 ita sei hasai programa asaun anual, no husi programa ne’e saida mak gasta, saida mak atu halo, no osan hira mak sei prevee no gasta iha 2024,” Xanana subliña.

Jornalista : Vito Salvadór