Halai Hosi Baucau Kaer Iha Díli, Autór Abuzu Seksuál bá Minoridade Kumpre Prizaun Tinan Hitu

Hatutan.com, (25 Jullu 2023), Díli—Polísia Nasionál Timor-Leste (PNTL), liuhosi Departamentu Investigasaun Kriminál Nasionál (DIKN) kaer ona sidadaun mane ida ho inisial OJF, hanesan autór bá kazu abuzu seksuál hasoru minoridade iha Munisípiu Baucau.

PNTL liuhosi Departamentu Investigasaun Kriminál Nasionál (DIKN) kaer sidadaun mane ida ho inisiál OJF, hanesan autór bá kazu abuzu seksuál hasoru minoridade, kaer iha área Has-laran, Delta-III, Suku Comoro, Postu Administrativu Dom Aleixo, Munisípiu Díli, Tersa (25/07/2023). Foto/Elio dos Santos da Costa.

Autór ho inisiál OJF ne’e, ekipa konjunta kompostu hosi DIKN ho Komandu Munisípiu Baucau, kaer ohin Tersa 25 Jullu 2023, tuku 11:30 meiudia otl, iha área Has-laran, Delta-III, Suku Comoro, Postu Administrativu Dom Aleixo, Munisípiu Díli.

Lee Mós: NS Halo Violasaun Seksuál Hasoru JC ho Moras Mentál to’o Isin-rua

Atuasaun Polísia nian ne’e ho baze bá Mandadu Detensaun hosi Tribunál Judisiál Primeira Instánsia Baucau nian (TJPIB) ho NUC 0046/18.BCSIC.

Hafoin halo kapturasaun, ekipa transporta kedan autór ne’e bá iha Kuartél Jerál PNTL, hodi pasa sertidaun moris no identidade nian bá Investigadór sira iha Departamentu Investigasaun Kriminál Nasionál (DIKN).

Iha Mandadu Detensaun atu kumpri prizaun ne’e, Juiza Direitu Yudi Paramukas, iha Tribunál Baucau, fó órden katak, atu halo detensaun bá arguidu OJF no lori kedan bá iha Estabelesimentu Prizionál, hodi kumpri pena prizaun tinan hitu (7) iha prizaun Becora.

Molok ne’e Suspeitu mós  tuir ona prossesu Primeiru Interrogatóriu Juidisiál iha Tribunál Baucau no desizaun hosi Juiz sira iha tempu ne’ebá, hasai ona desizaun hodi aplika medida koasaun prizaun preventiva bá arguidu, tanba autór bá krime abuzu seksuál hasoru menór.

Iha Kódigu Penál Timor-Leste nian Artigu 177 kona-bá krime Abuzu Seksuál, númeru 2 hateten katak, sé mak prátika aktu seksuál relevante ho labarik ne’ebé idade seidauk to’o tinan 14, sei hetan pena prizaun tinan 5 to’o 15.  

Jornalista: Rogério Pereira Cárceres