Kazu Omesídiu Elemloi, PNTL Detein Suspeitu HSM

Hatutan.com, (31 Jullu 2023), Díli—Forsa Konjunta kompostu hosi Polísia Nasionál Timor-Leste (PNTL), liuhosi Departamentu Investigasaun Kriminál (DIK), kaptura no detein ona sidadaun mane ida ho inisiál HSM, tanba deskonfia hanesan suspeitu ne’ebé oho vítima Isaac Sinarai (matebian) iha estrada públiku, besik rotunda área Elemloi, aldeia São José Ai-meti Laran, Suku Comoro, Postu Administrativu Dom Aleixo, Munisípiu Díli.

Forsa Konjunta kompostu hosi Polísia Nasionál Timor-Leste (PNTL), liuhosi Departamentu Investigasaun Kriminál (DIK), kaptura no detein sidadaun mane ida ho inisiál HSM, tanba deskonfia hanesan suspeitu ne’ebé oho vítima Isaac Sinarai (matebian) iha estrada públiku, besik rotunda área Elemloi, aldeia São José Ai-meti Laran, Suku Comoro, Postu Administrativu Dom Aleixo, Munisípiu Díli. Foto/Elio dos Santos da Costa.

Suspeitu HSM kaptura hosi forsa konjunta sira mak hanesan Departamentu Investigasaun Kriminál (DIK), Departementu Informasaun Polísia (DIP), Unidade Espesiál Polísia (UEP), FALINTIL Forsa Defeza Timor-Leste (F-FDTL) liuhosi Unidade-Falintil (UF), iha rezidénsia Maskareñas, aldeia 04, Suku Maskareñas, Postu Administrativu Vera Kruz, Munisípiu Díli, Segunda (31/07/2023) hale’u tuku 13:30 meiudia otl.

Lee Mós: Kazu Omesídiu Elemloi, PNTL Bolu no Halo Ona Identifikasaun bá Sidadaun 23

Kapturasaun bá suspeitu HSM ne’e ho baze mandadu-detensaun hosi Tribunál Judisiál Primeira Instánsia Díli (TJPID), ho NUC: 0002/23.PNSIC.

Hafoin kaer tiha suspeitu, Forsa Konjunta sira, evakua kedan HSM, bá iha Sala Investigasaun PNSIC nian, hodi submete bá iha sertifikasaun, nomós detein suspeitu iha sela-detensaun Komandu PNTL Munisipiu Dili iha Caicoli, durante oras 72 laran.

Tuir prazu legál ne’ebé iha, bainhira suspeitu kumpri ona oras 72 iha sela detensaun nian maka iha kuarta (02/08/2023), ekipa investigasaun kriminál nasionál, aprezenta kedan suspeitu bá prosesu primeiru interrogatóriu judisiál iha Tribunál Díli.

PNTL detein HSM tanba deskonfia hanesan suspeitu ne’ebé oho matebian Isaac Sinarai iha estrada públiku, besik rotunda área Elemloi, aldeia São José Ai-meti Laran, Suku Comoro, Postu Administrativu Dom Aleixo, Munisípiu Díli. Foto/Elio dos Santos da Costa.

Kazu asasinatu ne’e akontese iha Sesta (06/01/2023) hale’u tuku 02:00 dadeer, ne’ebé rezulta vítima mate iha fatin no monu bá trotoár leten ho raan suli hanesan bee ba rai.

Tuir gravasaun CCTV ne’ebé iha altura ne’ebá Polísia foti hatudu katak, vítima la’o hela, derrepente ema na’in-rua ho motór halai toman iha lokál akontesimentu.

Nune’e, na’in-ida tuun lalais hosi motór leten diretamente lori kro’at atu hanesan ho tudik sona razada dala-haat ka dala-lima iha vítima nia kotuk laran no sona  dala-ida iha vítima nia kabun-mamar hodi hlao vítima monu bá rai.

Hafoin ho kro’at sona ku’ak tiha vítima monu bá rai, suspeitu sira ne’e ho motór halai lakon. Iha tempu ne’ebá kedan, autoridade polisiál liuhosi unidade oioin, halo esforsu hotu buka tuir autór sira ne’e.

Ikus mai, to’o fulan-hitu (7) liu ona mak PNTL liuhosi DIK halo kapturasaun bá suspeitu no oras ne’e detein ona iha sela detensaun PNTL nian iha Komandu Caicoli.

Jornalista: Rogério Pereira Cárceres