Tribunál Sira Kontinua Atende Kazu Urjénsia  Durante Férias Judisiál

Hatutan.com, (31 Jullu 2023), Díli—Hahú loron 1 fulan Agostu tinan ne’e, Tribunál sira iha férias judisiál maibé bainhira iha kazu bo’ot sira ho karaktér urjénsia hanesan Habeas Corpus no Providénsia Kautelár, Tribunál liu husi juiz tornu kontinua fo atendimentu.

Prezidente Tribunál Rekursu, Deolindo dos Santos, halo validasaun rezultadu Eleisaun Parlamentár 2023, Segunda (05/06/2023). Foto/Elio dos Santos da Costa

Prezidente Tribunál Rekursu (PTR), Deolindo dos Santos hateten,  durante Tribunál iha períudu feriadu, atividade judisiál sei suspende, to’o 15 Setembru.

Lee Mós: Tribunál Deside GMN Halo Demisaun Ilegál bá Julito Ximenes no Tenke Selu Nia Direitu Sira

“Se kazu bo’ot, Habeas Corpus no kazu providénsia kautelar ruma tama tenke deside, maibé prossesu bai-bain laiha,” Deolindo dos Santos hateten iha Ministériu Finansas, Segunda (31/07/2023).

Bainhira iha interrogatóriu, Polísia kaer ema tanba komete krime, entaun interrogatóriu la’o, tanba kazu sira ne’ebé tuir Lei hateten prosesu urjente maski iha férias judisiál.

“Se mak bele assegura buat ne’e la’o nafatin, mak juiz tornu ne’ebé kada Tribunál loron ida juiz ida hela iha ne’ebá. Tanba, juiz ida iha direitu ba loron 25 férias,” nia esplika.

Nune’e mós Juis Administradora Díli, Edita Palmira esplika, Tuir Lei, Estatutu no mós Lei organizasaun Judisiária, juis sira férias hahú hosi loron 1 Agostu to’o 15 fulan Setembru, maibé juiz turnu sira kontinua hala’o knaar atu atende kazu urjente sira.

Oras-ne’e daudaun, totál júis na’in 15 iha Tribunál Primeira Instánsia, kompostu hosi Juis prossesu sivil na’in-neen, juis koletivu na’in-rua no juis atende kazu krime iha na’in-sia.

Jornalista: Vito Salvadór/Estajiáriu Lazaro Pereira Quefi