Justisa & Krime
Tribunál Rekursu Notifika MP Kona-bá Fiskalizasaun Abstrata Estatutu Profisionál Pessoál PNTL
Hatutan.com, (01 Agostu 2023), Díli—Tribunál Rekursu (PTR), simu duni pedidu hosi Provedoria Direitus Humanos no Justisa (PDHJ) kona-bá fiskalizasaun abstrata konstitusionalidade bá artigu 128 hosi Dekretu-Lei númeru 69/2022, loron 28 fulan-Setembru (Estatutu profisionál pessoál ho funsaun polisiál iha Polísia Nasionál Timor-Leste).
Prezidente Tribunál Rekursu (PTR), Deolindo dos Santos. Foto/Dok.Hatutan.com.
Tanba ne’e, Tribunál Rekursu halo ona notifikasaun bá Ministériu Públiku (MP) hodi hato’o pareser molok pronunsia.
“Iha duni pedidu hosi PDHJ, husu atu Tribunál Rekursu halo fiskalizasaun ba norma balun iha estatutu PNTL nian ne’ebé hatama tiha ona no Tribunál Rekursu halo diskusaun ho juis sira, halo prossesu hodi notifika Ministériu Públiku atu fó sira nia pareser tuir buat ne’ebé Lei hateten depois MP pronunsia tiha mak Tribunál sei deside,” Prezidente Tribunál Rekursu (PTR), Deolindo dos Santos hateten iha Palásiu Prezidensiál Nicolau Lobato Bairr-Pité, Tersa (01/08/2023).
Deolindo dos Santos labele ko’alia buat ne’e tanba bainhira prossesu iha Tribunál Rekursu, Prezidente Tribunál Rekursu ka juis ruma labele pronunsia kona-bá méritu.
PTR ne’e esplika, iha Tribunál Rekursu matéria konstituisionál ne’e funsióna iha plenária signifika juis iha Tribunál Rekursu tama hotu kedan, tanba ne’e hanesan Prezidente Tribunál Rekursu labele antesipa tiha kedan desizaun sira ne’ebé iha.
“La’ós Prezidente Tribunál Rekursu mak sei deside. La’ós koletivu mak deside, maibé ne’e kompeténsia ne’ebé tuir Leir organizasaun judisiál ne’ebé foun, Parlamentu aprova tiha ona, ne’e tenke liu hosi plenária mak sei deside prossesu ida-ne’e. Tanba ne’e, buat ne’ebé ha’u bele hateten ba imi maka prossesu ne’e la’o no notifika ona MP atu fo pareser. Kona-bá desizaun atu sai metan ka mutin há’u labele dehan buat ida tanba orsida há’u mós sei deside hotu, se la’e há’u antesipa tiha fali desizaun ne’ebé atu sai mai,” nia subliña.
Iha notifikasaun ba fiskalizasaun abastrata ne’e Tribunál Rekursu notifika MP nia durasaun tempu loron 30 hahú hosi loron ne’ebé Tribunál Rekursu notifika no Ministériu Públiku sei fó nia pareser no Tribunál Rekursu sei deside.
Provedór Direitus Umanus no Justisa (PDHJ), Virgílio da Silva Guterres “Lamukan” hala’o audiénsia ho Prezidente Tribunál Rekursu, Deolindo dos Santos hodi husu fiskalizasaun abstrata ne’e iha 17 Jullu 2023.
Jornalista: Vito Salvadór