Arguidu HMS iha Indísiu Forte Envolve Kazu Oho Isac Sinarai

Hatutan.com, (03 Agostu 2023), Díli-Tribunál Judisial Primeira Instánsia Díli (TJPID) liuhosi depaixu ikus ne’ebé fó sai Kinta (03/08/2023), deside  no aplika medida koasaun prizaun preventiva bá arguidu ho inisial HMS tanba iha indísiu forte arguidu HMS envolve iha kazu omesídiu simplés iha área Elemloi, Díli, hodi rezulta vítima Isac Sinarai lakon vida ka mate.

Lee Mós : Kazu Omesídiu Elemloi, Arguidu HSM Alegadu Prizaun Preventiva

Polísia sira akompaña arguidu HMS iha Tribunál Díli, Kinta (03/08/2023). Foto/Elio dos Santos da Costa

Haktuir Mandadu Kondusaun Tribunál nian bá Prizaun dehan, lori arguidu ne’ebé mak identifika ona (HMS-red) bá iha fatin Estabelesimentu Prizionál hodi hein termu ikus inkáritu nian, iha prizaun preventiva bá prosesu ne’ebé mak refere ona, tanba iha indísiu bá prátika krime sira  hosi kódigu Penál nian.

Bá prosesu ida-ne’e, iha alegadaun Ministériu Publiku husu prizaun preventiva tanba konsidera indísiu forte katak, arguidu komete krime omesídiu.

Prosesu primeiru interrogatóriu ne’e prezide hosi Juiz turnu Afonso Carmona, Ministériu Públiku, reprezenta hosi Prokuradór Luis Hernani Rangel, Arguidu hetan asisténsia legál hosi Defensór Públiku João Carvalho.

Observasaun Hatutan.com nota iha Tribunál Judisial Primeira Instánsia Díli hafoin rona tiha desizaun ne’e, ekipa Departamentu Investigasaun Kriminal (DIK) PNTL nian transporta kedan arguidu HMS bá kumpri pena tinan 2 fulan 6 (prizaun preventiva) iha prizaun Becora, Díli.

Kazu omesídiu iha área Delta-Elemloi ne’e akontese iha Sesta, 06 fulan-Janeiru 2023, iha ne’ebé tuir prova hosi CCTV hatudu ema na’in-rua kondús motór ho kro’at sona vítima Isaac Hornai Baptista iha hirus-matan ho kotuk-laran, rezulta kanek grave to’o mate fatin.

 Jornalista: Rogério Pereira Cárceres