Kazu Omesídiu Elemloi, PNTL Kontínua Buka Autór Seluk

Hatutan.com, (04 Agostu 2023), Díli-Polisia Nasionál Timor-Leste (PNTL), Departamentu Investigasaun Kriminál (DIK) ho Servisu Informasaun Polísia (SIP) kontínua buka tuir autór ida seluk ne’ebé hamutuk ho arguidu HMS ne’ebé deskonfia envolve iha kazu omesídiu Elemloi hodi rezulta vítima Isac Sinarai da Costa lakon vida (mate).

Lee Mós : Arguidu HMS iha Indísiu Forte Envolve Kazu Oho Isac Sinarai

Kazu omisídiu ne’e  akontese iha Sesta,  06 fulan-Janeiru 2023, hale’u tuku 02:00 dadeer, ne’ebé rezulta vítima mate iha fatin no monu bá trotoár leten ho raan suli maka’as.

Komandante Jerál PNTL, Komisáriu Polísia Henrique da Costa. Foto/Elio dos Santos da Costa.

“Sé ita-boot sira hetene dehan, iha suspeitu seluk ida ne’ebé kondús hela motirizada, sé ita-boot sira hatene, fó hatene ami, para ami bele buka ida ne’e. Mais, ita hatene katak, prosesu ne’e, sei la’o hela, forsa konjunta kontínua buka tuir,” Komandante Jerál PNTL, Komisáriu Henrique da Costa hateten bá jornalista sira iha Centro de Formação Policia (CFP), Comoro, Díli, Sesta (04/08/2023).

Prova hosi gravasaun CCTV ne’ebé agora iha Polísia nia liman hatudu, vítima la’o hela, derrepente ema na’in-rua ho motór halai toman iha lokál akontesimentu no tuun diretamente sona ho kro’at bá vítima nia isin lolon to’o vítima monu bá rai.

Haree vítima monu ho ran,  suspeitu na’in-rua ne’e ho motór halai lakon. Iha tempu ne’ebá kedan, autoridade polisiál liuhosi unidade oioin, halo esforsu hotu buka tuir autór sira ne’e.

Ikus mai, to’o fulan-hitu (7) liu ona Forsa Konjunta sira liuhosi Departamentu Investigasaun Kriminál (DIK), Departamentu Informasaun Polísia (DIP), Unidade Espesiál Polísia (UEP), FALINTIL- Forsa Defeza Timor-Leste (F-FDTL) Unidade-FALINTIL kaptura  suspeitu ida ho inisiál  HMS, iha nia rezidénsia, aldeia 04, Suku Maskariñas, Postu Administrativu Vera Kruz, Munisípiu Díli, Segunda (31/07/2023) hale’u tuku 13:30 Otl.

Ho kapturasaun ne’e, Forsa Konjunta sira mós lori kedan suspeitu HMS bá detein iha sela detensaun Komandu PNTL Munisípiu Díli, durante oras 72. Hafoin ida ne’e, suspeitu submete kedan bá prosesu primeiru interrogatóriu judisial iha Tribunál Judisial Primeira Instánsia Díli (TJPID).

Liuhosi depaixu ikus ne’ebé fó sai Kinta (03/08/2023), deside  no aplika medida koasaun prizaun preventiva bá arguidu ho inisial HMS tanba iha indísiu forte arguidu HMS envolve iha kazu omesídiu simplés iha área Elemloi, Díli, hodi rezulta vítima Isac Sinarai lakon vida ka mate.

Autoridade polisiál sira sei buka tuir nafatin, suspeitu seluk tán ne’ebé mak envolve direta iha kazu asasinatu ne’e, tanba gravasaun CCTV ne’ebé iha altura ne’ebá Polísia foti hatudu katak, ema na’in-rua mak ho motór halai toman vítima iha lokál lokál krime nian.

Jornalista: Rogério Pereira Cárceres