Nasionál
Domingu, Mate-Isin Traballadór Na’in-2 iha Korea du Súl To’o Timor
Hatutan.com, (09 Agostu 2023), Díli—Mate-isin traballadór timoroan na’in-rua (2); Gracildo Soares da Silva ho Florindo de Araújo Fátima, sei to’o iha Timor Leste iha Domingu, 13 fulan-Agostu 2023.
Embaixadór Timor Leste iha Korea du Súl, Grégorio de Sousa bá haree mate-isin Timoroan na’in-rua iha kasa mortuária, iha Soon Chung Hyang University Hospital, Tersa (08/08/2023). Foto/Espesiál
Embaixadór Timor Leste bá Korea du Súl, Grégorio de Sousa, informa bá Hatutan.com liuhosi mensajen hateten, parte Embaixada Timor Leste nian iha Korea du Súl koordena ona ho Sekretária Estadu Formasaun Profisionál no Empregu (SEFOPE) atu mate-isin Timoroan na’in-rua ne’e bele sai hosi Seoul iha Sesta kalan liuhosi Singapura no Domingu dader sei liu mai Timor-Leste hodi SEFOPE bele entrega sira-nia isin ba família.
“Ha’u sei konfirma mate isin sai duni husi Seoul iha Sesta ka lae, maibe ami trata bele akontese ida-ne’e,” Embaixadór Grégorio de Sousa haktuir.
Iha Tersa 08 fulan-Agostu, Embaixador Gregório de Sousa akompaña hosi Adido Traballu, João das Neves, bá haree matebian Gracildo Soares da Silva no Florindo de Araújo Fátima nia isin, iha kasa mortuária, iha Soon Chung Hyang University Hospital.
Embaixada halo koordenasaun ho SEFOPE atu lori jovem na’in-rua nia isin, iha semana ida ne’e, hodi entrega bá família iha Timor-Leste.
Embaixada RDTL iha Korea du Súl ho funsionáriu tomak hato’o sentidas kondolensias bá família matebian Gracildo no Florindo iha Timor-Leste.
Joven traballadór Timoroan na’in-rua ne’e lakon vida iha aseidente tráfiku iha área sidade Metropolitana Daegu, Korea du Súl, Domingu 30 fulan-Jullu 2023.
Tuir informasaun katak traballadór timoroan na’in-tolu ho motór sai hosi sira-nia hela fatin hale’u tuku 12:50 kalan, atu bá kolega balun nia fatin. To’o iha dalan-klaran, sira-na’in-tolu enfrenta asidente tráfiku hodi rezulta sira na’in-rua mate fatin no na’in-ida kanek todan.
Jornalista Estajiáriu : Lazaro Pereira Quefi