Orsamentu Retifikativu $1.771.867.112 Aprovadu

Hatutan.com, (09 Agostu 2023), Díli—IX Governu Konstitusionál liu hosi reniaun Konsellu Ministru (KM) iha loron 09 fulan-agostu tinan 2023 aprova ona Orsamentu Retifikativu 2023 nian ho totál $1.771.867.112.

Reuniaun Konsellu Ministru IX Governu Konstitusional. Foto/Elio dos Santos da Costa.

“Orsamentu ne’e hetan aprovasaun iha Konsellu Ministru depois halo diskusaun no aprovasaun ba projetu Proposta Lei ba alterasaun dahuluk Lei n. 15/2022, loron 21 fulan-dezembru, kona-bá Orsamentu Jerál Estadu (OJE) bá tinan 2023 no Lei n. 2/2022, loron 10 fulan-fevereiru, kona-bá enkuadramentu bá Orsamentu Jerál Estadu no Jestaun Finanseira Públika no alterasaun daruak Lei n.8/2008, loron 30 fulan-juñu, Lei Tributária,” Hatutan.com sita komunikadu.

Lee Mós: Governu Sei Rezolve Problema Ai-moruk, Pasaporte no Vítima Dezastre Naturál Ho Orsamentu Ratifikativu

Ho projetu Proposta Lei ida-ne’e, despeza totál hosi Seitór Públiku Administrativu tinan 2023 ho valór totál konsolidadu $1.771.867.112.

Administrasaun sentrál iha despeza ida ne’ebé prevee ho valór $1.633.000.000. Seguransa Sosiál, sein Fundu Rezerva Seguransa Sosiál, ho montante $130.965.306 (iha valór totál konsolidadu la kontabiliza montante $75.860.306 hosi Seguransa Sosiál ne’ebé mai hosi transferénsia administrasaun sentrál hodi evita ninia kontajen duplikada).  Rejiaun Administrativa Espesiál Oecusse Ambeno (RAEOA) iha despeza ida ne’ebé prevee ho valór $1.771.867.112.

Jornalista: Vito Salvadór