Mate-Isin Traballadór Timoroan Na’in-rua hosi Korea du Súl To’o Ona Timor

Hatutan.com, (13 Agostu 2023), Díli- Mate-isin joven timoroan na’in-rua; Florindo de Araújo Fátima ho Gracildo Soares da Silva, Domingu dadeer ne’e (13/08/2023), to’o ona iha Timor-Leste liuhosi Aeroportu Internasionál Prezidente Nicolau Lobato.

Lee Mós: Domingu, Mate-Isin Traballadór Na’in-2 iha Korea du Súl To’o Timor

Família sira simu ho tanis mate-isin Florindo de Araújo Fátima ho Gracildo Soares da Silva ne’ebé mate iha Korea du Súl, 30 Jullu 2023. Foto/Elio dos Santos da Costa

Sekretáriu Estadu Formasaun Profisionál no Empregu (SEFOPE), Rogério Araújo Mendonça, hamutuk ho família simu mate-isin joven  na’in-rua ne’ebé transporta ho aviaun Royal Buthan Airlines.

Sekretáriu Estadu Formasaun Profisionál no Empregu (SEFOPE), Rogério Araújo Mendonça, lori IX Governu Konstitusionál nia naran hato’o sentidu kondolénsia bá família matebian Florindo de Araújo Fátima ho Gracildo Soares da Silva.

Nia dehan, hanesan membru Governu ne’ebé tau matan bá traballadór sira iha li’ur triste ho falesimentu joven traballadór Timoroan na’in-rua ne’e tamba sira mak sai liña segundu bá libertasaun povu ida-ne’e.

“Esforsu ne’ebé ami iha mak ida ne’e, ami mós sente triste tebe-tebes bá ami nia joven na’in-rua ne’ebé husik hela ita hotu-hotu. Sira na’in-rua sai hanesan liña segundu bá libertasaun povu ida-ne’e, liberta ekonomia família, liberta ekonomia iha nasaun laran,” SEFOPE Rogério Araújo Mendonça  hateten.

Nia hatutan, sira bá servisu iha rai-liur ho objetivu atu hadi’a ekonomia família uma-laran no hasae kreximentu ekonomia iha nasaun laran.

Mate-isin Florindo de Araújo Fátima ho Gracildo Soares da Silva ne’ebé mate iha Korea du Súl to’o ona Timor-Leste, Domingu (13/08/2023). Foto/Elio dos Santos da Costa

“Ohin sira fila ona bá Aman Maromak, husu ba família fiar nafatin bá Aman Maromak, dalan ne’ebé sira bá ita hotu-hotu sei bá,” nia subliña.

Reprezentante família, Soares Gusmão Ximenes hanesan maun hosi matebian Florindo de Araújo Fátima  hodi família nia naran hato’o agradesimentu bá IX Governu Konstitusional liuhosi SEFOPE  ho Embaixada Timor Leste iha Korwa du Súl ne’ebé halo esforsu koordenasaun servisu ho Governu Korea du Súl hodi lori sira nain-rua nia isin mate mai hikas moris fatin Timor-Leste.

Bá traballadór Timoroan hotu ne’ebé iha Korea du Súl, padre no madre hotu iha Korea du Súl ne’ebé halo mos esforsu halot mate-isin ho di’ak too ohin loron família simu ho di’ak.

“Ami nia mensajen hosi familia mak ne’e, bá Timoroan sira iha li’ur evita konsumu alkohol barak, hemu natoon atu bele deskansa tamba imi ba servisu ho objetivu atu hadi’a família nia moris no kontribui ba kreximentu ekonomia iha nasaun ne’e,” Soares Gusmão Ximenes hateten.

Leandro Xena nu’udár reprezentante família hosi matebian Gracildo Soares da Silva, lori mós família nia naran hato’o agradesimentu bá IX Governu Konstitusional lideradu  husi Primeiru-Ministru Kay Rala Xanana Gusmão, bá SEFOPE, Embaixadór Timor-Leste iha Koreia du Súl,  Grégorio de Sousa, adidu traballadór no Timoroan hotu ne’ebé ho esforsu no dedikasaun tulun iha prosesu hotu to’o ikus mai sira nia isin-mate to’o iha Timor-Leste.

“Ho ida ne’e hodi família bo’ot matebian Gracildo Soares da Silva nian hakarak hato’o agradesimentu boot bá estadu no governu liuhosi SEFOPE,” Leandro Xena hateten.

Matebian Sira-Nia Biografia Badak

Mate-isin Florindo de Araújo Fátima ho Gracildo Soares da Silva to’o iha Timor-Leste, Domingu (13/08/2023). Foto/Elio dos Santos da Costa

Matebian Florindo de Araújo Fátima moris iha Ainaro, Nunumoge, Postu Administrativu Hatu Builico, Munisípiu Ainaro, iha loron 10 fulan-Janeiru 1992.

Matebian Florindo oan hosi Francisco Araújo no Felicidade Cardoso. Matebian nu’udár oan bá dahaat husi maun-alin na’in-hitu.  Nia remata eskola Secundário iha Escola Tékniku Agrikola Same, Nularan iha 2015.

Hahú kursu lian Korea bá programa EPS topic iha 2015, no pasa ba ezame CVT komputer basic test iha 2016 no hetan kontratu hosi empreza hodi ba servisu iha Korea du Súl iha área peska no hakotu vida tamba asidente tráfiku iha 30 fulan-Jullu 2023.

Matebian Gracildo Soares da Silva moris iha Dili, iha loron 29 Agostu 1986, oan hosi António de Jesus da Silva no Fernanda da Silva.

Matebian Gracildo nu’udár oan bá datoluk hosi maun-alin na’in-ualu.  Nia remata eskola Secundário iha Escola 28 Novembru iha tinan 2007. Hahú kursu lian Korea bá programa EPS topic iha 2010, no pasa bá ezame TVT paper basic test iha 2010 no hetan kontratu bá servisu iha Korea  iha área Peska too hakotu vida tamba asidente tráfiku iha 30 fulan-Jullu 2023.

Jornalista: Vito Salvadór