Raya Tex ho Hatutan.com Sai Patrosinadór bá Ekipa U-40 TL iha VIP ASEAN Competition

Hatutan.com, (18 Agostu 2023), Jakarta- Empreza Raya Tex no mídia online Hatutan.com sai patrosinadór bá ekipa VIP Timor-Leste U-40 iha kompetisaun VIP Association of Southeast Asian Nation (ASEAN) ne’ebé hala’o iha Jakarta, Indonézia.

Ekipa jogadór U-40 Timor-Leste. Foto/Atan Lemos

Jogu VIP ASEAN Competition rasik hala’o iha Indonézia-Jakarta hahú iha loron 18 no sei termina iha loron 20 fulan-Agostu 2023.  

Kontribuidór Hatutan.com, Atan Lemos hosi Jakarta relata  iha jogu VIP ASEAN Competition  ne’e, ekipa Timor-Leste sei kompete hamutuk ho ekipa U-40 hosi nasaun seluk ASEAN nian hanesan Filipina,  Singapura, Vietnam, Tailándia, Indonézia, Brunei Darussalam, Malázia, Kambodia, Myanmar ho Laos.

Koordenadór VIP Timor-Leste, Gapar Quintao da Silva, iha Jakarta lori  ekipa VIP futebol Timor-Leste agradese bá na’in Raya Tex  ho Mídia  Hatutan.com ne’ebé sai hanesan gold sponsor bá ekipa U-40 Timor-Leste.

“Hosi ekipa VIP futebol Timor-Leste nian hato’o agradesimentu ua’in tebes bá iha patrosinadór bá ekipa ida ne’e, Raya Tex no Hatutan.com, espesiál bá CEO Raul Lemos hanesan na’in bá empreza rua ne’e no mós nia espoza Kris Dayanti   (KD) ne’ebé oferese ona apoiu ida ne’e mai ekipa, no lori ekipa nia naran hato’o agrdesimentu no obrigado ua’in,”  Koordenadór VIP Timor- Leste, Gaspar Quintão da Silva hateten, Sesta (18/08/2023).

Timor Leste Manan Filipina 3-0. Foto/Atan Lemos

Jogadór sira ne’ebé tama iha ekipa VIP Timor-Leste maioria ho idade 40 ba leten no ekipa ne’ebé arranka bá Jakarta kompostu husi jogadór na’in- 19 inklui ofisiál na’in-haat (4) ho total ema na’in-23.

“Jogu ida-ne’e, jogu bá antigu jogadór sira, no kompetisaun ne’e naran VIP ASEAN Competition, no ho ida-ne’e mak Timor Leste hetan konvite hodi hola parte bá kompetisaun ida ne’e no maioria jogadór sira idade 40 bá leten,”  Gaspar Quintão da Silva hateten

Iha primeiru jogu  VIP ASEAN Competition iha Jakarta,  Timor-Leste lakon ho Tailandia ho skor 1-2 no  iha fali segundu jogu nian Timor-Leste manan Filipina ho skor 3-0. Iha terseiru jogu kontra Indonézia iha Sesta loraik ne’e,  Timor-Leste lakon ho skor 2-1. ***