Kontribuisaun Seguransa Sosiál, Kada Sidadaun iha Direitu bá Subsídiu Neen ho Pensaun Haat

Hatutan.com, (24 Agostu 2023), Díli—Kada sidadaun ne’ebé kontribui Seguransa Sosiál bá iha Institutu Nasionál Seguransa Sosiál (INSS), ikus mai sei hetan direitu bá subsídiu neen (6) no mós pensaun haat (4).

nstitutu Nasionál Seguransa Sosiál (INSS) realiza diseminasaun informasaun bá Lei númeru 12/2016 kona-bá Rejime Kontributivu Seguransa Sosiál iha Luro, Munisípiu Lautém, Kinta (24/08/23). Foto: INSS.

Reprezentante Jurista no Xefe Aprovisionamentu, INSS, Zeferino da Costa Bobo esplika asuntu ne’e durante diseminasaun no sosializasaun Lei númeru 12/2016 kona-bá Rejime Kontributivu Seguransa Sosiál iha Luro, Munisípiu Lautém, Kinta (24/08/23).

Lee Mós: Dekretu-Lei ba Aprovasaun Konstituisaun Fundu Rezerva Seguransa Sosiál iha Ona

Zeferino da Costa Bobo esplika, benefísiu hosi kontribuisaun ne’ebé sidadaun ida halo durante ne’e sei lori benefísiu an rasik ho familia rasik hanesan feen ka laen ka oan sira iha agora no futuru.

Diretu 10 ne’ebé hetan depois de ema ida kontribui mak hanesan, direitu ba Subsídiu neen no pensaun haat.

1) Subsidiu Maternidade, 2) Subsidiu Paternidade, 3) Subsidiu Adosaun, 4) Subsidiu Risku Kliniku durante isin Rua, 5) Subsidiu Interrupsaun gravidéz ka abortu no Subsidiu mate ka reembolsu funerál no Iha pensaun haat mak hanesan, 7) Pensaun Sobrevenvénsia, 8) Pensaun Invalidéz absoluta, 9) Pensaun Invalidéz Relativa no 10) Pensaun Velhise ka reforma.

“Subsidiu no pensaun Sira ne’e ita bele rekere bainhira ita kumpri ona prazu garantia tuir durasaun ka prazu kontribuisaun hodi bele benefisiu bá subsídiu no pensaun sira ne’ebé sita ona,” Hatutan.com sita deklarasaun Zeferino Bobo, iha komunikadu.

Partisipante sira iha diseminasaun ne’e senti kontente tanba rona kona-bá sira nia diretu no devér, prevensaun ba aktu korrupsaun, boa governasaun, jestaun patrimóniu Estadu, prossesu disiplinár, Rejime karreira, avaliasaun dezempeñu, manuál lisensa sem vensimentu, orientasaun pensaun reforma iha Funsaun Públiku no Lei Rejime Kontributivu Seguransa Sosiál.

Partisipante, Domingos Gonçalves no Administradór Postu Luro agradese ba ekipa integradu liu-liu Institutu Nasional Seguransa Sosiál bele tuun direta esplika kona-bá benefisiu hosi sira nia kontribuisaun tantu funsionariu kontratadu no permanente, tanba durante ne’e sira dúvida hela no sira rekomenda atu sosializasaun hanesan ne’e bele kontinua iha futuru.

Jornalista Estajiáriu: Lazaro Pereira Quefi