São Tomé e Príncipe Sei Oferese Formasaun bá Joven Timoroan iha Área Turizmu

Hatutan.com, (29 Agostu 2023), Díli—Prezidente Parlamentu Nasionál (PPN), Deputada Maria Fernanda Lay, hala’o enkontru kortezia ho nia omólogu Prezidente Assembleia Nasionál São Tomé e Príncipe (STP), Celmira Sacramento, hodi ko’alia kona-bá problema kampu servisu ne’ebé nasaun rua enfrenta ligadu ho tema prinsipál iha Simeira CPLP bá dala XIV kona-bá “Juventude Sustentabilidade”.

Prezidente Parlamentu Nasionál (PPN), Deputada Maria Fernanda Lay, hala’o enkontru kortezia ho nia omólogu Prezidente Assembleia Nasionál São Tomé e Príncipe (STP), Celmira Sacramento, iha edifísiu Prezidente Assembleia Nasionál São Tome e Príncipe, Tersa (29/08/23). Foto: PN.

“Enkontru kortezia aproveita oportunidade mai to’o ona iha São Tomé. Ami ko’alia pontu rua liga ho tema ne’ebé ko’alia horseik liga ho juventude sustentabilidade ne’ebé ita mós iha problemas ho kampus de traballu. Ita nia joven barak sai bá rai li’ur. Sira mós hanesan, maibé la preparadu. Ida-ne’e mak ita preokupa,” Hatutan.com sita deklarasaun Fernanda Lay, iha komunikadu, Tersa (30/08/23).

Lee Mós: São Tomé e Príncipe Lidera Prezidénsia CPLP 2023-2025

Enkontru ne’ebé hala’o iha edifísiu Prezidente Assembleia Nasionál, parte rua konkorda atu iha estabelesimentu kooperasaun entre Timor-Leste ho São Tomé e Príncipe, nune’e bele haruka joven Timoroan sira mak tuir formasaun kona-bá turizmu no gastronomia.

Fernanda Lay propoin atu hetan apoiu hosi São Tomé e Príncipe kona-bá futuru reuniaun UIP nian, nune’e Portugés bele sai lian servisu iha UIP no la presiza halo tradusaun bainhira ko’alia ho lian refere.

Durante enkontru, ko’alia mós kona-bá kooperasaun entre Parlamentu Nasionál Timor-Leste ho Assembleia Nasionál São Tomé e Príncipe nian atu bele iha interkámbiu entre deputadu sira hosi nasaun rua, tanba Timor forma ona grupu amizade ho São Tomé e Príncipe.

Prezidente PN, deputadu Maria Fernanda Lay ho Deputadu António da Conceição hala’o mós vizita bá iha plenária Assembleia Nasionál São Tomé e Príncipe nian.

Lee Mós: XIV Konferénsia CPLP Foka bá Sustentabilidade Juventude

Jornalista: Vito Salvadór