Membru F-FDTL Na’in-tolu Hetan Insidente Durante Ezersísiu Militár iha Austrália

Hatutan.com, (01 Setembru 2023), Díli—Membru FALINTIL Forsa Defeza Timor-Leste (F-FDTL), na’in-tolu (3) hetan dezastre durante partisipa iha treinamentu militár ho naran ezersísiu Predatór, iha Territóriu Norte Darwin-Austrália, Kuarta (30/08/2023).

Membru FALINTIL Forsa Defeza Timor-Leste (F-FDTL) ne’ebé hetan dezastre durante partisipa iha treinamentu militár ho naran ezersísiu Predatór, iha Territóriu Norte Darwin-Austrália, hala’o hela tratamentu iha ospitál ida iha Austrália, Kuarta (30/08/2023). Foto: F-FDTL.

Membru F-FDTL na’in-tolu ne’ebé hetan kanek iha ezersísiu ne’e mak hanesan, Tenente Juvinál Ribeiro, Cabo Agostinha dos Santos, Soldadu Bartolameu de Sousa Nunes.

Lee Mós: F-FDTL Manán Esperiénsia Hosi Ezersísiu “Harii Hamutuk”

Portavós F-FDTL, Capitão de Mar e Guerra João da Silva informa, iha semana kotuk membru hamutuk na’in-30 hosi Komponente Terrestre (CT-Sigla Português), simu órden komandu nian hodi bá partisipa missaun Forsa Armada liuhosi ezersísiu kombinadu ida ho naran “Exercicies Predators”.

Ezersísiu ne’e inisia hosi Forsa Defeza Austrália iha tinan barak nia laran no nasaun barak hosi rejiaun Pasífiku nian mak partisipa.

Infelizmente, iha faze treinamentu ida-ne’e, militár timoroan na’in-tolu mak hetan insidente iha terrenu bainhira hala’o tátika viatura nian.

“Iha duni akontesimentu ida, involve membru F-FDTL iha ezersísiu ida naran Predator. Sira na’in-tolu, rua mak kanek kamán, ida mak kanek todan oitoan. Agora sira hala’o hela tratamentu iha Ospitál militár. Sira na’in-tolu ne’e iha ofisiais ida ho soldadu na’in-rua,” Capitão de Mar e Guerra João da Silva hateten liuhosi konferénsia imprensa iha Kuartél Jenerál, Fatuhada, Díli, Sesta (01/09/2023).

Capitão de Mar e Guerra João da Silva informa, ezersísiu ne’e kombinadu entre Forsa Armada sira hosi País barak.

Maibé, informasaun ofisiál no detallu kona-bá akontesimentu insidente bá nia membru na’in-tolu ne’e, komandu seidauk simu hodi komprova asidente viatura, tátiku, iha territóriu Darwin-Austrália.

“Akontesimentu ida-ne’e, iha hori-bainruak. Tuir informasaun ne’ebé komandu simu ona na’in-tolu mak hetan kanek no agora daudaun ne’e iha faze tratamentu hela. Informasaun ikus, ohin sira iha kondisaun saúde di’ak oitoan ona,” nia esplika.

Hatán kona-bá mensájen korájen nian hosi komandu bá membru sira ne’ebé hetan kanek iha insidente ne’e, komandante João da Silva dehan, militár ne’e bainhira selesionadu iha prossesu rekrutamentu, no konklui ona formasaun militár, sira halo kedan ona juramentu.

“Juramentu ne’ebé mak sira halo, hateten katak, kuandu nessesáriu bele fó sira-nia vida bá mate. Ezersísiu ne’e hanesan baibain ona, monu, tohar, atu própriu mate mós, tanba ne’e militár ninian duni, atu oinsá mak bele prepara nia mentál, morál tenke liuhosi buat sira ne’e hotu,” Capitão de Mar e Guerra João da Silva afirma.

Ezersísiu kombinadu ne’e dezeña hosi nasaun amigu Austrália no sira mós mak konvida Militár F-FDTL bá partisipa.

Durasaun tempu formasaun ne’e depende bá sira, bele semana ida ka rua no balun bele tuir to’o fulan-ida, foin konklui.

Jornalista: Rogério Pereira Cárceres