Ramos-Horta Kontinua Fó Atensaun bá Edukasaun Militár

Hatutan.com, (04 Setembru 2023), Díli—Prezidente Repúblika (PR), José Ramos-Horta hanesan mós Komandante Supremu bá Forsas Armadas, husu ba Xefe Estadu-Maiór-Jenerál Forsas Armadas, Tenente Jenerál Domingos Raul “Falur Rate Laek” atu alerta edukasaun militár bá membru sira nune’e labele viola regra sira ne’ebé ikus mai hamosu dezintendimentu iha públiku.

Prezidente Repúblika (PR), José Ramos-Horta hanesan mós Komandante Supremu bá Forsas Armadas, hala’o enkontru regulár ho Xefe Estadu-Maiór-Jenerál Forsas Armadas, Tenente Jenerál Domingos Raul “Falur Rate Laek” iha Palásiu Prezidensiál Bairru-Pité, (04/09/2023). Foto: Média PR.

Ramos-Horta  husu ne’e durante enkontru regulár ho Xefe Estadu-Maiór-Jenerál Forsas Armadas, Tenente Jenerál Domingos Raul “Falur Rate Laek” iha Palásiu Prezidensiál Bairru-Pité, (04/09/2023).

Lee Mós: Hakarak Tama Militár, Labele Halimar!

“Prezidente Repúblika José Ramos-Horta alerta kona-bá edukasaun bá militár sira. Há’u mós husu ajuda atu Xefe Estadu ajuda há’u, ministru, governu, jornalista apoiu há’u atu ita hotu eduka militár sira sai militár ida ne’ebé ema hotu hadomi, ema hotu gosta hanesan ho valór sira uluk avo sira bainhira ba fatin ne’ebé de’it, ninia inan no maun alin mak iha ne’ebá subar fó han nia, fó informasaun ba nia, atu nia bele halo ninia missaun di’ak liu,” Falur Rate Laek hateten.

Durante enkontru ne’e mós Falur Rate laek atualiza pontu situasaun militár nian, situasaun operasionál lójistika, atividade diária inklui situasaun pessoál saúde militár.

Komandu mós informa bá Xefe Estadu kona-bá forsa na’in 30 bá tuir treinamentu ka ezersisiu militár predatoran iha Austrália, hafoin simu informasaun direta tanba iha momentu ne’ebá Xefe Estadu Maiór mós iha hela reuniaun ida maibé Xefe Estadu Maiór Forsa Terrestre ninian akompaña hela sira iha Austrália.

“Ba mak assidente ona iha ne’ebá ne’e ita simu ninia risku,” nia subliña.

Maibé nia atualiza katak, memebru Forsa Armada na’in tolu ne’ebé hetan asidente agora daudaun rekopera hotu ona.

Membru Tiru Sidadaun iha Likisá Prossesu La’o Hela

Tenente Jenerál Falur Rate Laek hateten Kona-bá prossesu bá membru F-FDTL ne’ebé foin lalais tiru labarik ida iha Likisá ne’e kontinua la’o, no iha tempu badak sei iha solusaun.

“Prosesu la’o hela. Nia iha hela detensaun, no bainhira nonok ne’e lá’ós ema toba nonok, prosesu la’o hanesan ne’e, maibé ninia solusaun sei iha,” Falur Rate Laek hateten tán.

Jornalista: Vito Salvadór