Lidera SNI, Longuinhos Monteiro Promete Atua ho Profisionál

Hatutan.com, (05 Setembru 2023), Díli—Estrutura tuan Serviço Nacional de Inteligiência (SNI) lidera hosi Coronél Domingos da Câmara “Amico”, ofisialmente entrega podér bá estrutura foun lidera hosi Longuinhos Rabindranatha Tagore Domingos dé Castro Monteiro, nu’udar Diretór Jerál SNI nian.

Ofisiál Superiór F-FDTL nian, Majór Jenerál João Miranda “Aluk Descartes”, akompaña diretór jerál Longuinhos Rabindranatha Tagore Domingos dé Castro Monteiro ho estrutura foun Serviço Nacional de Inteligiência (SNI) iha serimónia entrega podér ne’ebé hala’o iha Palásiu Governu, Tersa (05/09/2023). Foto: Elio dos Santos da Costa.

Serimónia entrega podér ne’e hala’o iha Sala Prezidénsia Konsellu Ministru (PCM-Sigla Português), Palásiu Governu-Díli, Sesta 05 Setembru 2023, tuku 10:30 Otl. Maibé, serimónia ne’e taka bá média no bandu atu halo kobertura bá eventu ne’e.

Lee Mós: PM Xanana “Ezonera” Koronél Amico hosi SNI

Hafoin serimónia entrega podér, Diretór Jerál foun SNI nian, Longuinhos Monteiro promete katak, durante mandatu tomak, bainhira mosu kazu ruma sei halo atuasaun ho profisionál.

“Depois ita sei haree ida-ne’e. Ha’u la haree pessoál. Ha’u haree bá profisionál ninian. Obrigadu,” Longuinhos Monteiro hateten hafoin serimónia entrega no simu podér.

Longuinhos Monteiro hato’o ida-ne’e, hodi hatán bá jornalista Hatutan.com kona-bá ninia nomeasaun ne’ebé hetan reasaun maka’as hosi públiku no deskorda ho ninian integridade pessoál, oinsá ninian pozisaun perante krítika hirak ne’e.

Diretór Jerál SNI, Longuinhos Rabindranatha Tagore Domingos dé Castro Monteiro.

Observasaun Hatutan.com iha Palásiu Governu-Díli, hafoin serimónia entrega podér bá estrutura foun SNI nian ne’e, hosi estrutura SNI sesante, Adjuntu Diretór Jerál SNI, Ajente Polísia Gastão Piedade, akompaña hosi Ofisiál Superiór F-FDTL nian, Majór Jenerál João Miranda “Aluk Descartes”, inklui reprezentante sira hosi Komandu Jerál Polisia Nasionál Timor-Leste (PNTL) ho Policia Ciêntífica e de Investigação Criminal (PCIC).

Jornalista: Rogério Pereira Cárceres