Felícia Carvalho Substitui Helder Lopes nu’udár Vise-Ministra Finansas

Hatutan.com, (11 Setembru 2023), Díli—Felícia Claudinha Cruz Carvalho, sei substitui Vise-Ministru Finansas sesante Helder Lopes iha mandatu IX Governu Konstitusionál.  

Lee Mós : Prezidente Repúblika Aprova Proposta Primeiru-Ministru bá Ezonerasaun Vise-Ministru Finansas

Felícia Carvalho. Foto/Espesiál

Hanesan informa nanis ona katak Helder Lopes sei simu posse iha Kuarta, 13 fulan-Setembru tinan ne’e, hodi nu’udár Governadór Banku Sentral Timor-Leste (BCTL, sigla portugés) hodi troka Abrão de Vasconcelos.  

Ho nomeasaun bá kargu foun Governador BCTL ne’e, iha loron 07 fulan-Setembru liubá, Prezidente Repúblika, José Ramos-Horta uza nia kompeténsia tuir Dekretu Prezidente Repúblika 2023/kona-bá ezonerasaun, aprova pedidu hosi Primeiru-Ministru (PM) Kay Rala Xanana Gusmão kona-bá ezonerasaun Helder Lopes hosi pozisaun Vise-Ministru Finansas.

Informasaun ne’ebé Hatutan.com asesu hosi fontes Governu, inklui mós fontes kuadru superiór sira iha partidu CNRT dehan, Felícia Claudinha Cruz Carvalho ne’e militante CNRT nian no iha esperiénsia servisu iha área finansas públika.

Iha tinan 2007-2012, Felícia Claudinha Cruz Carvalho hala’o knar  nu’udár asesora iha Gabinete Ministra  Finansas Emilia Pires no   tinan 2017, Felícia Carvalho servisu nu’udár Xefe Unidade Jestaun Parseiru Dezenvolvimentu iha Ministériu Planu Finansas.

Proposta PM Xanana nian bá PR José Ramos-Horta kona-bá nomeasaun bá Vise-MF, Felícia Carvalho. Foto/Repro

Tuir fontes oioin ne’ebé servisu hamutuk ho Felícia Claudinha Cruz Carvalho durante ne’e iha Ministériu Finansas iha tempu sira liubá hateten, Felícia Carvalho iha esperiénsia no koñesimentu  di’ak tebes  iha planu finansas no bele dehan peritu iha área planu, jestaun no analiza  ekonomia mikro no ekonomia makro.

Iha Segunda, 11 fulan-Setembru 2023, liuhosi proposta nomeasaun hosi Primeiru-Ministru (PM), Xanana Gumão, husu bá Prezidente Repúblika, José Ramos-Horta, atu fó posse bá Vise-Ministra Finasas, Felícia Claudinha Cruz Carvalho. 

Proposta ne’e ho númeru 095/PM-GPM/IX/2023, asina diretamente hosi Primeiru-Ministru Xanana Gusmão. 

Proposta ne’e ho konsiderasuan bá ezonerasaun Vise-Ministru Finasas sesante Helder Lopes bazeia bá dekretu Prezidente Repúblika númeru 86/2023, 8 fulan-Setembru, ne’ebé haktuir iha Konstituisaun RDTL artigu 106. 

Jornalista : Vito Salvadór