Mane Ida Mate Mistériu iha Karreta Laran

Hatutan.com, (11 Setembru 2023), Díli—Sidadaun mane ida ho inisiál MT (46) hakotu-iis ho kondisaun toba hela iha nia karreta laran.

Sidadaun mane ida ho inisiál MT (46) hakotu-iis ho kondisaun toba hela iha nia karreta laran, iha área Otél Rafa, Segunda 11 Setembru 2023. Foto: Rogério Pereira Cárceres.

Tuir informasaun hosi ema sira ne’ebé hela besik iha área Otél Rafa informa katak, iha Segunda 11 Setembru 2023, ohin, hale’u tuku 10:57 otl, karreta rua mak tama duni bá arredór Otél ne’e.

Lee Mós: Veteranu Carlos Pires Mate “Mistériu”

Maibé, lakleur de’it karreta ida fila ka sai fali hosi otél, hela de’it mak karreta ida mak sei nafatin estasiona ka para iha arredór otél nian. Maibé, na’in la konsege hamate karreta ne’e, husik moris de’it to’o lorokraik tuku 14:00 resin.

Ho nune’e, pessoál seguransa sira iha otél ne’e, ida besik bá karreta ne’e atu haree no konfirma karreta ne’e tanba sáida mak na’in la hamate.

Pessoál seguransa ne’e konsege loke odamatan karreta nian, hateke bá karreta laran ema ida mak toba hela iha karreta ne’e nia laran, maibé ho kondisaun iis kotu ona.

Tánba ida-ne’e maka pessoál seguransa sira ne’e informa kedan bá PNTL hodi tun no halo atendimentu bá kazu insidente ne’e.

Matebian ninia kartaun identidade ne’ebé husik hela iha Karreta laran ho deskrisaun katak,  sidadaun ne’e ho inisiál MT, oríjen hosi Suku Foho Ai-Liko, Postu Administrativu Hato-Udo, Munisipiu Ainaro.

Iha Dili, matebian hela iha aldeia Badiak, Suku Manleuana, Postu Administrativu Dom Aleixo, Munisipiu Díli.

Observasaun Hatutan.com iha lokál insidente nota katak, daudaun ne’e ekipa Departamentu Investigadaun Nasionál PNTL nian, iha ona fatin insiente no halo hela análiza, inklui rekolla ona mós evidénsia balun, no transporta ona mós mate-isin ba HNGV Bidau, hodi submete bá prosesu autópsia.

Jornalista: Rogério Pereira Cárceres