Ministériu Justisa Konklui Investigasaun bá Kaderneta Passaporte 150.000 Ne’ebé Lakon

Hatutan.com, (12 Setembru 2023), Díli—Ministériu Justisa (MJ) finaliza ona investigasaun bá kaderneta passaporte 150.000 ne’ebé lakon no sei fo-sai rezultadu iha tempu badak.

Jornalista Hatutan.com Vito Salvadór halo entrevista ho Ministru Justisa, Amândio de Sá Benevides iha salaun auditória Ministériu Finansas, Aitarak Laran, Tersa (12/09/2023).

“Investigasaun halo tiha ona no ita finaliza ona. Nia rezultadu mak ita bo’ot sira sei rona,” Ministru Justisa (MJ), Amândio de Sá Benevides  hateten bá Hatutan.com iha salaun auditória Ministériu Finansas, Aitarak Laran, Tersa (12/09/2023).

Lee Mós: Kaderneta Passaporte Rihun 150 Lakon

Ministru Justisa argumenta katak, rezultadu finál seidauk iha tanba sei hein atu kompleta tán dokumentu balun hosi parte relevante sira molok fó sai bá públiku.

Iha tinan 2017, kompañia fornesedór kaderneta passaporte nian bá Ministériu Justisa,  Visamitra  ho nia parseiru internasionál ida (jv/joint venture), prevee kaderneta passaporte  ho kuantidade 150.000 hodi responde nesesidade povu nian maibé to’o agora kaderneta hirak ne’e lakon de’it iha Diresaun Jerál Rejistu Notariadu (DGRN).

Iha Tersa (14/03/2023), Ministru Justisa (MJ) sesante, Tiago Amaral Sarmento deklara katak, deskonfia kaderneta passaporte 150.000 mak lakon de’it.

Tanba ne’e, nia komunika ona ho parte relevante sira iha Diresaun Jerál Servisu Rejistu Notariadu atu kria ekipa ida hodi halo investigasaun.

Ministru Justisa (MJ) sesante, Tiágo Amaral Sarmento, mós hakfodak tanba kaderneta passaporte ne’ebé empreza fornesedór Visamitra  ho nia parseiru (empreza internasionál ida) oferese ne’e atu bele responde bá nesesidade emisaun passaporte bá povu Timor-Leste hosi 2017-2022, maibé kaderneta lubun ne’e nia paradeiru la haree to’o ohin loron.

Ministru Tiágo Amaral konta tuir katak iha fulan kotuk, nia hamutuk ho Diresaun Notáriu nian inklui diretór hotu, sira halo ona reuniaun ida, ho na’in bá kompañia  fornesedór ne’ebé impríme kaderneta ko’alia kona-bá assuntu ne’e.

Iha sorumtuu ne’e, na’in bá kompañia fó ona esplikasaun, no to’o ona mós kompromisu ida. Tanba kuaze tinan 20-resin, kompañia ida de’it mak fornese kederneta passaporte bá Timor-Leste.

Antes ne’e iha Kuarta (15/03/2023), Diretór Diresaun Jerál Servisu Rejistu Notariadu (DJSRN), João Fernando Martins Borges mós deklara katak, prontu koopera ho Ministériu Justisa bá halo investigasaun no buka tuir kaderneta passaporte 150.000 ne’ebé deskonfia lakon iha Notariadu.

Jornalistas: Vito Salvadór