Relatóriu Komisaun E: Maioria Infra-estrutura Públiku iha Manufahi Aat

Hatutan.com, (19 Setembru 2023) Díli– Komisaun E Parlamentu Nasionál bá asuntu Infra-estrutura, Segunda (19/09/2023), aprezenta sira-nia relatóriu fiskalizasaun iha Munisípiu Manufahi bá iha plenária PN. Iha relatóriu ne’e Komisaun E-PN  mensiona kondisaun infra-estrutura públiku, hanesan estrada, ponte, kanalizasaun bee-moos, drenajen, poste eletrisidade, eskola públiku balun ho mós  fasilidade seluk tan iha área jurizdisaun  Munisípiu Manufahi nian maioria aat no grave tanba inundasaun ne’ebé akontese iha fulan-Jullu 2023.

Lee Mós: Rai Monu Taka Totál Estrada Ligasaun Díli Bá Manufahi no Ainaro

Udan-boot durante loron tolu, hahú hosi loron 03-05 fulan-Jullu 2023, rezulta rai halai no rai monu hodi taka tomak estrada kuaze metru 50 iha Aldeia Airaca-Lau, Suku Ai-Tutu, Postu Administrativu Maubisse, munisípiu Ainaro, no komunidade susar atu asesu mai Díli, Sesta (07/07/2023). Foto/Dok. Hatutan.com

Membru Parlamentu Nasional hosi Komisaun E, Deputada Irene Gonçalves Sarmento,  ne’ebé aprezenta relatóriu fiskalizasaun ne’e akresenta katak udan-anin ho intensidade forte ne’ebé akontese iha loron 03 fulan-Jullu liubá rezulta mós poste eletrisidade iha suku Daisua Postu-Administrativu Alas tohar nune’e afeta  liña distribuisaun eletrisidade  ho distánsia kilómetru 250 nia funsionamentu.

Dadus balun ne’ebé Komisaun E rekolla hosi Obras Públika Munisípiu Manufahi nian identifika  ponte 13 mak presiza halo manutensaun ne’ebé rezulta hosi hosi udan-anin iha fulan-Jullu liubá.

Iha relatóriu fiskalizasaun ne’ebé hato’o hosi komisaun E, sita mós katak empreza lokál no komunidade Postu-Administrativu Same Vila servisu hamutuk hodi konstrui ponte emerjénsia ho gratuita, hodi bele fasilita komunidade sira-nia konektividade, liu-liu fasilita movimentu rodaviáriu iha Munisípiu Manufahi la’o ho normál fali.

Dadus ne’ebé Komisaun E-PN rekolla hosi Bee Timor-Leste, Empréza Públika (BTL, E.P) katak BTL,E.P nia parte instala ona mós sistema bee-moos hamutuk 184, no abitante  hamutuk 56448 (84% populasaun ) mak asesa ona sistema bee-moos, mezmu abitante 10752 (16% populasaun) mak seidauk asesa.

Molok ne’e, servisu Munisipál Aguá no Saneamentu Ambiente iha Munisípiu Manufahi, halo ona levantamentu bá sistema sira, maibé, hafoin situasaun udan-anin ne’ebé akontese iha munisípiu refere  rezulta katak, iha sistema hamutuk 14 mak hetan estragu, ho kalkulasaun orsamentu pur-volta $8305.14 hodi bele halo fali manutensaun.

Iha  fulan-Janeiru to’o fulan-Agostu 2023, EDTL,E.P Munisípiu Manufahi rekolla ona reseita hodi kontribui bá kofre Estadu $98338.24, enkuantu iha tinan 2022 BTL, E.P, rekolla reseita $8452, no iha fulan-Janeiru to’o  fulan-Jullu 2023, hamutuk $5938.

Munisípiu Manufahi selebra ona kontratu Kompaña My Friend Constraction L.da ho tipu servisu route mountenance  work performs manutensaun bá reabilitasaun iha kapitál munisípiu inklui postu-administrativu sira seluk iha Munisípiu Manufahi ho tipu konstrusaun multi-up durante tinan rua.

“Obra ida-ne’e seidauk hahú tanba orientasaun hosi diresaun jerál  estradas  ponte kontrolu seias hateten hein diresaun jerál  estradas ponte kontrolu seias sei halo uluk veifikasaun foin fó orden servisu bá kompaña hodi hahú servisu,” Deputada Iréne relata informasaun ne’e iha plenária PN.

Jornalista Estajiária: Zita Menezes