FBTL Tenke Esklarese Boxe Timoroan Falla Kompete iha Asian Games

Hatutan.com, (25 Setembru 2023), Díli- EL Matador Boxing Club ezije atu Federasaun Boxe Timor-Leste (FBTL) tenke halo esklaresimentu bá públiku relasiona ho boxe Timoroan  ne’ebé falla kompete iha kompetisaun Asian Games bá dala-XIX Hangzhou, Xina.

Lee Mós: Boxe Timor-Leste La Joga iha Asian Games Tanba La Prienxe Rekizitu IBA ho World Boxing

Reprezenta klube El Matador, Abílio Orlando dos Santos. Foto/Elio dos Santos da Costa

Reprezenta klube El Matador, Abílio Orlando dos Santos, hateten parte klube El Matador ezije klarifikasaun husi parte responsavel sira relasiona ho boxe Timoroan sira ne’ebé falla kompete iha Asian Games.

“Ha’u hanoin problema ida ne’e, hanesan ita hotu hatene katak husi federasaun mak prepara atleta no Komité Olímpiku Nasional Timor-Leste (CONTL) mak fasilita, maibé tamba saida mak boxe sira ne’e bá hetan problema iha ne’ebá. Ha’u fiar katak iha tempu badak ita hetan klarifikasaun hosi parte responsavel sira, liu-liu federasaun tamba iha notísia balun ne’ebé iha hateten ita falla submete dokumentu importante sira no medical report bá iha parte International Boxing Association (IBA) no World Boxing,” Abílio Orlando dos Santos  hateten  iha konferénsia ba imprensa,  Segunda (25/09/2023).

Nia hatutanrekizitu  sira ne’ebé International Boxing Association (IBA) no World Boxing ezije, ida ne’e ofisial treinadór no treinadór sira ne’ebé lori boxe sira ba mak tenke responsabiliza. Tanbasá mak rekizitu sira ne’e la prienxe no durante fulan hira preparasaun tanbasá federasaun la prepara kondisaun sira ne’e, no ida ne’e problema boot.

“Hanesan reprezentante klube El Matador no reprezentante Boxe Delio Anzaqeci Mouzinho nian triste. Atleta boxe sira ne’e iha prestasaun di’ak, sira foin fila hosi kompetisaun iha Vietnam no parte tékniku sira mak tenke responsabiliza bá fallansu sira ne’ebé agora iha, signifika treinadór selesaun nasionál inkapasidade ho problema ida-ne’e,” Nia argumenta.

Antes ne’e, iha dadeer oras 09:28 Otl, Hatutan.com tenta komunika ho Sekretáriu Jerál Federasaun Boxe Timor-Leste (FBTL), Rogério Amaral Soares, ne’ebé oras ne’e hamutuk ho delegasaun Timor-Leste iha Hangzhou Xina, maibé la fó resposta ho razaun rede internet la di’ak. Hatutan.com  manda mós pergunta liu husi  mensajen WhatsApp maibé la fó resposta.

Jornalista: Vito Salvadór