MOP Hahú Re-dezeñu Estrada Urbana iha Díli no Sei Tau Alkatraun iha 2024

Hatutan.com, (26 Setembru 2023), Díli- Ministru Obras Públika (MOP), Samuel Marçal hateten, halo ona orientasaun tékniku bá iha konsultór sira atu halo re-dezeñu bá iha estrada urbana sira iha sidade Díli, nune’e iha 2024 bele tau alkatraun hodi evita rai-rahun iha sidade laran.

Lee Mós: Kay Olok La’ós Asesór Maibé Voluntáriu iha Ministériu Obras Públiku

Kondisaun estrada iha área Bua-Laran, Manleuana, Díli. Foto/Elio dos Santos da Costa

Ministru Obras Públika (MOP), Samuel Marçal bá jornalista sira iha edifísiu MOP, Kaikoli, Díli, Tersa (26/09/2023), hateten, estrada urbana sira iha sidade Díli iha ona planu no agora orienta ona bá iha konsultór sira atu halo re-dezeñu, liu-liu bá iha urbana Díli laran, ne’e inklui estrada Ailok-laran no fatin-fatin sira ne’ebé kuak no rungu-ranga ne’e sei halo fila fali dezeñu ida didi’ak.

“Ita iha ona planu halo re-dezeñu bá estrada urbana sira iha sidade Díli, atu nune’e, tinan 2024 ita bele tau hotu ona alkatraun hodi  evita  iha rai-rahun iha sida laran, selae karreta tama sai bairru laran sira ne’e lori hotu rai rahun, fo’er sira ne’e mai hotu estrada laran no fó impaktu ba saúde públika,” Ministru Samuel Marçal hateten.

“Ita iha prioridade atu tau alkatraun ba iha estrada sira iha bairu sira ne’e, atu nune’e bairu sira ne’e moos no kabeer,” Nia tenik.

Jornalista: Vito Salvadór