Deskonfia Falsifika Dokumentu Veteranu, PNTL Detein Suspeitu AdJN

Hatutan.com, (27 Setembru 2023), Díli-Polísia Nasionál Timor-Leste (PNTL) liuhosi ekipa Departamentu Investigasaun Kriminál (DIK), Kuarta (27/09/2023), hale’u tuku 14.00 Otl, halo detensaun bá sidadaun mane ida ho inisial AdJN iha Aldeia Lemorai, Suku Vila Verde, Díli, tanba deskonfia komete falsifikasaun dokumentu no dadus sira veteranu nian.

Lee Mós: Falsifika Dadus Veteranu, PCIC Submete Kazu 32 ba Ministériu Públiku

Detensaun ne’e baze bá Mandadu Detensaun hosi Tribunál Judisial Primeira Instánsia Suai nian (TJPIS) ho NUC: 0135/16.PDSUA.

Foto/Repro Google

Konteúdu hosi mandadu detensaun ne’e fó ordém bá autoridade polisiál atu halo detensaun no lori bá iha estabelesimentu prizionál suspeitu ne’ebé identifikadu, hodi bá kumpri pena tinan neen (6) tuir kondenasaun iha prosesu ne’ebé refere ona, tán autória krime Burla Agravada, Falsifikasaun Dokumentu no Korrupsaun Passiva, ne’ebé  p.p (prizaun preventiva), artigu 267, iha a-linea 1, 304, iha a-linea 1, 292, iha a-linea 1, hothotu hosi Kódigu Penál nian.

To’o iha suspeitu ninia rezidénsia, parte ekipa polisial sira ne’ebé halo ezekusaun bá mandadu Tribunál nian ne’e, esplika bá família, kona-bá sira-nia prezensa atu foti suspeitu, no lori bá detein.

Maibé, hosi parte família sira informa katak, sira-nia aman, tiun, avó enfrenta hela moras no durante ne’e médiku sira, bá halo de’it tratamentu bá saúde iha nia hela-fatin.

Aprosimasaun no negosiasaun la’o besik oras balu nia laran entre ekipa PNTL ho família sira, inklui suspeitu nia advogadu rasik, ikus mai, haree direta no konfirmadu katak, suspeitu ho kondisaun saúde ne’ebé la permite atu la’o sai, tanba enfrenta moras no gráve tebes. Suspeitu ninia forsa, hetan ajuda de’it ho oksijéniu.

Hafoin parte rua entende malu, polisia husu autorizasaun bá família, hodi hasai de’it fotográfia sira kona-bá suspeitu ninia kondisaun saúde hodi sai hanesan evidénsia atu justifika fila-fali bá Tribunál. Suspeitu AdJN hanesan mós veteranu ida no durante ne’e simu hela pensaun veteranu nian.

Informasaun seluk ne’ebé Hatutan.com asesu hosi família sira iha Vila Verde katak, iha 2017, suspeitu sofre moras iha kabun, no konsege halo operasaun. Ikus mai, hetan tán asidente ho motór, rezulta kanek, no efeitu negativu boot liután bá suspeitu ninia moras antigu sira to’o ohin loron sai gráve.  

Jornalista: Rogério Pereira Cárceres