Ezekutivu CONTL Balun Lori Fen-Oan Partisipa Asian Games Hangzhou

Hatutan.com, (27 Setembru 2023), Díli—Atleta Timoroan sira ne’ebé reprezenta Timor-Leste iha Asian Games Hangzhou-Xina, la kontente haree ezekutivu balun hosi Komité Olímpiku Nasionál Timor-Leste (CONTL, sigla portugés) lori feen ho oan bá hotu partisipa iha kompetisaun nivel internasionál ne’e.  

Lee Mós: Polémika Boxe Timoroan La Partisipa Asian Games, Ministru Nelio Isaac Konfirma: “Ita Mak La Halo Atualizasaun Relatóriu Médiku”

Atleta Timor-Leste partisipa iha abertura Asian Games Hangzhou-Xina ne’ebé hala’o iha Hangzhou Olympic Sports Centre Stadium, Sábadu 23 Setembru 2023. Foto/Supply

Fontes Hatutan.com nu’udár mós atleta hosi modalidade  balun ne’ebé husu atu labele publika nia identidade informa katak atleta timoroan sira hosi modalidade 10 ne’ebé hola parte iha kontinjente Timor-Leste bá Asian Games Hangzhou-Xina ba dala-19 hakfodak no balun husu bá malu, oinsá mak ezekutivu CONTL nian balun bele fasilita fen-oan mai hotu partisipa iha  Asian Games ne’e.

Fontes ne’e hateten nia buka hatene informasaun hotu-hotu kona-bá ezekutivu CONTL ne’e nia fen ho oan no hosi informasaun sira-ne’e hateten katak ezekutivu CONTL ne’e nia fen partisipa iha Asian Games ne’e tanba reprezentante Federasaun Jinástika Timor-Leste.

Maski nune’e, tuir informasaun balun katak, mezmu CONTL simu ona Federasaun Jinástika Timor-Leste nu’udár membru, maibé seidauk hetan lejitimasaun hosi Notariadu no informasaun ne’ebé iha mós katak Federasaun Jinástika seidauk sai membru Konfederasaun Desportu  Timor-Leste  (CDTL).

Kona-bá ezekutivu CONTL ne’e nia oan mane, fontes ne’e relata katak ezekutivu nia oan mane ne’e nu’udár atleta hosi Federasaun Natasaun Timor-Leste (FNTL).

“Kestaun ne’ebé ami atleta sira preokupa mak ezekutivu CONTL nia fen ho oan mai partisipa Asian Games ho dalil ka modus dehan sira-na’in-rua (inan-oan); ida reprezenta Federasaun Jinástika (inan) no ida oan atleta Natasaun.  Ami espera katak sira-na’in-rua nia alojamentu durante estadia iha Hangzhou-Xina  no tikete aviaun  bá-mai  hodi partisipa iha Asian Games ne’e responsabilidade privadu, mas se ami hotu utiliza de’it orsamentu ne’ebé apoiu hosi Governu, ida-ne’e mak ema bolu konflitu interese,” fontes ne’e haktuir bá Hatutan.com liuhosi telefónika, Kuarta (27/09/2023).

Atleta timoroan sira mós nota no haree katak ezekutivu CONTL nia feen ne’e hetan mós asesu livre hanesan bainaka VIP iha serimónia abertura Asian Games iha loron 23 fulan-Setembru 2023 no hela fatin mós iha VIP.

Hatutan.com tenta ona halo konfirmasaun bá Sekretáriu Jerál CONTL, Laurentino Guterres, liuhosi  komunikasaun WhatsApp, maibé nia parte seidauk bele responde tanba komunikasaun liuhosi WhatsApp iha fatin sira hela bá susar halo kontaktu.

“Bomdia Mano, WA iha ne (ne’e) susar halo kontaktu,” mensajen WhatsApp hosi Laurentino Guterres mai Hatutan.com

MJDAC Apoiu $379.000  

Ministru Juventude, Desportu, Arte no Kultura, Nelio Isaac Sarmento, hamutuk ho CONTL no Federasaun Boxe  Amadora Timor-Leste no Bexe Timoroan buka solusaun bá polémika Beoxe Timoroan na’in-4 la partisipa iha Asian Games bá da-19 iha Hangzhou, Xhina. Foto/Mídia MJDAC

Hanesan informa ona katak total kontinjente Timor-Leste ne’ebé partisipa iha Asian Games Hangzhou-Xina na’in-56, kompostu hosi atleta na’in-26 no restu husi númeru ne’e ofisial ho xefe delegasaun.

Númeru atleta na’in-26; feto na’in-ualu (8) no mane na’in-18 mai hosi modalidade 10 no apoiu orsamentu hosi Governu  liuhosi Ministériu Juventude, Desportu Arte no Kultura (MJDAC) bá CONTL hodi fasilita partisipasaun Timor-Leste nian iha Asian Games ne’e hamutuk $379.000.

Atleta timoroan sira ne’ebé partisipa ne’e mai hosi Federasaun Atletizmu, Taekwondo, Boxing, Karate-Do, Tiru, Badminton, Tenis Kampu, Natasaun, Halterifilizmu no Voleibol Praia.

Asian Games bá dala-19 ne’e hahú iha loron 23 fulan-Setembru no sei termina iha loron 08 fulan-Outubru 2023. 

Jornalista : Vito Salvadór