Horta-Xanana Konsidera Prezensa Manny Pacquiao Hanesan Animadór-Promosaun bá Dezenvolvimentu Boxe TL

Hatutan.com, (29 Setembru 2023), Díli—Prezidente Repúblika (PR), José Ramos-Horta ho Primeiru Ministru (PM) Kay Rala Xanana Gusmão konsidera prezensa Boxista Legendáriu hosi nasaun Filipina, Manny Pacquiao hanesan animadór ida no mós hanesan promosaun ida bá dezenvolvimentu boxe iha Timor Leste (TL).

Prezidente Repúblika, José Ramos-Horta simu vizita Boxista Legendáriu hosi nasaun Filipina, Manny Pacquiao, iha Palásiu Prezidensiál Bairru-Pité, Sesta (29/09/2023). Foto: Elio dos Santos da Costa.

“Manny Pacquiao nia naran koñesidu iha mundu no iha fatin-fatin no iha Timor Leste joven sira koñese. Importante tebes nia vizita atu anima desportu boxe iha Timor Leste espesifiku ba joven barak ne’ebé involve iha desportu boxing,” Ramos-Horta hateten hafoin simu vizita Manny Pacquiao iha Palásiu Prezidensiál Nicolau Lobato Bairr-Pité, Sesta (29/09).

Lee Mós: FBTL Tenke Esklarese Boxe Timoroan Falla Kompete iha Asian Games

Prezidente Repúblika promete sei konvida hikas senadór Manny Pacquiao mai Timor-Leste iha loron restaurasaun indepedénsia 20 Maiu tinan 2024, atu reprezenta povu Filipina iha selebrasaun ne’e.

Intensaun prinsipál maka, atu senadór Manny Pacquiao bele motiva, hamoris modalidade boxe ba foinsa’e iha Timor Leste.

Xefe Estadu mós konsidera vizita Manny Pacquiao bele promove desportu enjerál no hametin liu tán relasaun amizade entre povu Filipina no Timor-Leste.

Prezidente Repúblika, José Ramos-Horta simu vizita Boxista Legendáriu hosi nasaun Filipina, Manny Pacquiao, iha Palásiu Prezidensiál Bairru-Pité, Sesta (29/09/2023). Foto: Elio dos Santos da Costa.

“Vizita ne’e mos atu hametin liu tan relasaun bilaterál povu ba povu Filipina no Timor Leste ne’ebé iha relasaun antigu ona no kleur tebes iha ne’ebé povu Filipina sempre apoia Timor Leste no Timoroan lubuk ida uluk ba estuda iha Filipina,” Ramos-Horta haktuir.

Alende ne’e, ho prezensa senadór ne’e bele kontribui mós ba atrasaun entre nasuan rua Filipina ho  Timor hanesan nasaun Katóliku iha Azia.

Tuir planu, Xefe Estadu Ramos-Horta sei hala’o vizita ofisiál Estadu nian bá Filipina iha fulan Novembru tinan ne’e.

Iha fatin hanesan, Manny Pacquiao agradese ba ema hotu-hotu, bá média no funsionáriu hotu-hotu ne’ebé fó bem vindu ba nia ho di’ak tebes.

“Ha’u nia vizita dala uluk mai Timor Leste, ha’u kontente. Ami apresia imi nia atensaun no bem vindu. Ha’u espera katak, vizita ida-ne’e la’ós ikus, tanba ha’u mós iha planu atu promove boxe iha Timor Leste no mós halo investimentu iha Timor Leste iha ‘area desportu,” Manny Pacquiao agradese.

Durante hasrou-malu ho Prezidente Repúblika, Pacquiao fahe oitoan kona-bá nia esperénsia iha pasadu no esperénsia iha Manila, no buat hotu ne’ebé kona-bá boxing liga ho nia karreira, liuliu saida mak nia sei kontribui ba dezenvolvimentu boxing iha TL.

Manny Pacquiao Sei halo Promosaun Boxing Iha TL

Primeiru Ministru, Kay Rala Xanana Gusmão simu vizita Boxista Legendáriu hosi nasaun Filipina, Manny Pacquiao, iha Palásiu Governu, Sesta (29/09/2023). Foto: Elio dos Santos da Costa.

Boxista Legendáriu Manny Pacquiao, planeia hela atu halo promosaun kona-bá eventu Boxing nian iha Timor-Leste.

Manny Pacquiao hato’o ida-ne’e hafoin sorumutu ho Primeiru Ministru, Kay Rala Xanana Gusmăo, iha Palásiu Governu, Díli.

Durante enkontru, Xanana Gusmão mós apresia ho prezensa Pacquiao nian tanba bele aproveita atu halo promosaun bá desportu boxe iha Timor Leste.

“Enkontru ho Primeiru Ministru di’ak tebes. Ami ko’alia kona-bá posibilidade promosaun iha ne’e, iha Timor Leste. Ha’u iha planu hela atu halo promosaun iha Timor Leste iha tinan ida ne’e,” Manny Pacquiao hateten hafoin hasoru malu ho Kay Rala Xanana Gusmão iha Palásiu Governu-Díli.

Manny Pacquiao ninia prezensa iha TL, tanba simu konvite hosi Governu TL liuhosi Ministériu Juventude Desportu Arte no Kultura (MJDAK). Iha konvite sira antes ne’e nia la konsege responde, tanba nia iha ona konkordánsia ho nasaun seluk.

Primeiru Ministru, Kay Rala Xanana Gusmão simu vizita Boxista Legendáriu hosi nasaun Filipina, Manny Pacquiao, iha Palásiu Governu, Sesta (29/09/2023). Foto: Elio dos Santos da Costa.

“Ha’u mai iha ne’e, iha edisaun ne’e, sira mak konvida ha’u no dezde tinan 2016 maibé iha altura ne’ebá, ha’u okupadu tanba ha’u iha tiha ona komitmentu atu vizita bá nasaun seluk. Tanba ne’e, tempu ne’e sira konvida ha’u, no ohin ha’u bele mai iha ne’e,” Manny Pacquiao hateten.

Hafoin vizita bá Xanana Gusmăo, Pacquiao mós sei vizita bá Gym sira, klubu Boxsista lokál sira, hodi hatene oinsá nia bele ajuda sira.

Identidade loloos hosi Boxista Legendáriu ne’e maka Emmanuel Dapidran Pacquiao alias Manny Pacquiao ne’ebé moris iha loron 17 fulan Dezembru 1978, iha rai Kibawe, Bukidnon, Filipina.

Jornalista: Vito Salvadór/Rogério Pereira Cárceres