Hatutan.com, (01 Outubru 2023), Díli- Prezidente Repúblika (PR), José Ramos-Horta, sei simu Prémiu Dona Maria de Las Nieves of Parma iha Jenebra, Suisa.
Prezidente Repúblika, José Ramos-Horta. Foto/Espesiál
Komunikadu bá imprensa ne’ebé Hatuta.com asesu hosi Gabinete Palásiu Prezidensiá, Domingu (01/10/2023), relata Prezidente Repúblika Demokrátika Timor-Leste, José Ramos-Horta sei halo vizita traballu bá Jenebra, Suisa, hosi loron 2 to’o loron 4 fulan-Outubru 2023.
Durante vizita loron tolu estadia iha Jenebra, Prezidente Ramos-Horta sei partisipa iha abertura Flagship Summit on Building Bridges, partisipa iha lansamentu Peace Finance Initiative iha Sentru Konvensaun Internasionál Geneva.
Iha vizita ne’e, Xefe Estadu sei hasoru Prezidente Munisípiu Jenebraa, no hasoru malu ho Diretór-Jerál Organizasaun Mundial Komérsiu.
Advertisement
Prezidente Ramos-Horta sei simu Prémiu Dona Maria de las Nieves of Parma iha loron-4 Outubru 2023.
Objetivu husi vizita traballu mak atu fahe no buka apoiu finanseiru no oportunidade kooperasaun.
Prezidente Ramos-Horta sei partisipa iha jantar ne’ebé Alfonso Gomez, Prezidente Munisípiu Jenebra, organiza iha loron 2 fulan-Outubru 2023.
Prezidente Repúblika sai hosi Dili bá Jenebra ho Aviaun Bhutan Airlines iha loron 01 fulan-Outubru no sei fila hikas mai Díli, Timor-Leste, iha loron 06 fulan-Outubru 2023.