Tribunál Primeira Instánsia Díli Kontinua Adi’a Julgamentu Kazu José Bernardo

Hatutan.com, (04 Outubru 2023), Díli—Tribunál Primeira Instánsia Díli (TPID) kontinua adi’a julgamentu kazu José Bernardo ne’ebé mate mistériu iha sela, durante loron rua tutuir-malu, hahú hosi Tersa 03 no Kuarta 04 Outubru 2023, tanba juiz sira tuir hela formasaun.

Matebian José Bernardo. Foto/Ilustrasaun

Tuir ajenda TPID, iha Tersa fulan ne’e liu hosi Puiza Albertina Neves tenke kontinua rona argidu sira, maibé seidauk bele rona ho razaun Juiza Prizide tuir formasaun, tanba ne’e muda ba loron 04  fulan Outubru, maibé kontinua laiha rezultadu tanba Juiza ne’e nafatin tuir formasaun.

Lee Mós: José Bernardo Soares Mate iha Sela Polísia Sei iha Investigasaun

Ho razaun ne’e, liu hosi ofissiál Justisa fó informasaun katak, ho Juiza Prezide ne’ebé tuir hela formasaun, nune’e deside adi’a tan julgamentu bá loron 26 fulan Novembru 2023 dader tuku 10:00 hodi rona argidu na’in-tolu.

Sidadaun ho naran José Bernardo de Jesus Soares, tinan 21, hela iha Audian, Kampu Futeból nia sorin ne’ebé mak lakon vida iha Sela Detensaun Komandu Polisia Munisípiu Díli, tama bá detensaun iha 01 Setembru 2022, tanba sai suspeitu bá kazu baku-malu ne’ebé rezulta vítima hetan ofensa integridade grave no baixa iha sela ICU HNGV.

Suspeitu ka vítima mate iha sela detensaun iha tuku 19:0 kalan Otl, mate, ho tali tara iha karokok.

Hafoin mate, Polísia Munisípiu Díli halo kontaktu bá família hodi bá haree no akompaña, lori bá mortuáriu HNGV hodi hein desizaun bá autópsia.

Iha momentu kalan ne’ebá, autoridade sira hosi Ministériu Públiku Distritu Díli nian, PNTL Munisípiu Díli, Komandante PNSIK, PDHJ, Advogadu halo sorumutu hodi define investigasaun tuir ida-idak nia mandatu.

Lee Mós: Autópsia Mate Isin José Bernardo, “Mamiik Nakfera” no “Ook Metan”

Jornalista: Gloria Maia