Polémika Eleisaun Komisáriu CAC, CNRT Prefere Governu Komunika Fali ho Bankada FRETILIN

Hatutan.com, (05 Outubru 2023), Díli-Bankada CNRT iha Parlamentu Nasionál (PN) prefere bá IX Governu Konstitusionál atu komunika fali ho Bankada FRETILIN atu bele iha konsensu iha únika kandidatu Komisáriu Komisaun Anti Korrupsaun (CAC, sigla portugés).

Lee Mós:  Eleisaun Komissáriu CAC, FRETILIN Hakarak Konsensu ho Kandidatu Ida De’it

Bandeira Partidu CNRT

Vise Xefe Bankada CNRT, Patrocínio Fernandes konsidera pozisaun Bankada FRETILIN nian hodi rejeita kandidatu komisáriu na’in-rua bá CAC; Sérgio de Jesus Fernandes da Costa Hornai ho Rui Pereira dos Santos no hakarak  konsensu ho kandidatu ida de’it ne’e dirije bá Governu tanba Governu mak submete kandidatu na’in-rua ne’e mai PN atu vota ka hili.

“Klaru katak bá komisáriu CAC ne’e Governu propoin ona kandidatu na’in-rua; Sérgio de Jesus Fernandes da Costa Hornai ho Rui Pereira dos Santos. Bá ha’u Bankada FRETILIN nia hanoin ne’e dirije bá iha Governu tanba Governu mak iha kompeténsia haruka kandidatu sira ne’e bá komisáriu CAC,” Deputadu  Patrocínio Fernandes haktuir bá Hatutan.com iha Parlamentu Nasionál, Kinta (05/10/2023).

Deputadu hosi Bankada CNRT ne’e rekoñese katak Bankada FRETILIN  nia prezensa iha plenáriu atu halo eleisaun bá komisáriu CAC ne’e importante tebes,  tanba ne’e parte CNRT mós buka hela entendimentu hodi bele hili komisáriu ne’e ho di’ak.

“Se deputadu hosi Bankada FRETILIN  mak la marka prezensa iha plenáriu ida-ne’e,  labele halo eleisaun tamba la prienxe kuorum,” Patrocínio hateten.  

Atu prienxe kuorum bá eleisaun komisáriu CAC tenke atinje 2/4 ka rua baluk haat prezensa deputadu sira-nian. Signifika, Deputadu sira tenke marka prezensa na’in-42+1.

Jornalista Estajiáriu : Lazaro Pereira Quefi