Bankada FRETILIN Garante Subsídiu Millaun $4 bá Importadór Foos La Rezolve Problema

Hatutan.com (09 Outubru 2023), Díli– Prezidente Bankada FRETILIN iha Parlamentu Nasionál (PN), Aniceto Guterres, konsidera politíka IX Governu  nian hodi fó subsidiu millaun $4 bá importadór sira atu hatama foos mai Timor-Leste sei  la rezolve problema foos folin sa’e iha rai-laran.

Lee Mós: Governu Tau Millaun $4 Fó Subsídiu bá Importadór Foos

Prezidente Bankada FRETILIN iha Parlamentu Nasionál, Aniceto Longuinhos Guterres. Foto/Dok. Hatutan.com

Prezidente Bankada Fretilin Aniceto Guterres hateten, tipu subsídiu sira hanesan ne’e di’ak liu fó   direta bá agrikultura sira hodi  prodúz foos.

“Ita nia problema foos ida rai-laran, la’ós  tanba foos husi rai- li’ur nia folin sa’e. Klaru, foos hosi rai-li’ur mai iha ne’e folin sa’e  ita labele kontrola. Iha rai-laran, ita  laiha produsaun, ita-nia produsaun menus loos la to’o para atu konsumu iha rai-laran. Ema timor mak konsumu mós la to’o,”  Aniceto Guterres haktuir bá jornalista sira iha PN, Segunda (09/10/2023).

“Tuir ha’u nia opiniaun, sala ita la rezolve problema ida, ita só bele rezolve problema kuandu ita fó subsidiu bá agrikultura sira hodi prodús,” teník Prezidente Bankada FRETILIN, Aniceto Guterres.

Nia dehan,  uluk VIII Governu nia politíka sesta bazika ne’e para atu insentiva agrikultura sira atu prodúz ne’e mak sira fó sesta bazika, agora ida-ne’e mós hasai hotu, ne’e politíka sira atu rezolve saida?

“Sé para atu fó subsidia bá malu tanba kompaña sira iha difikuldade, sim, maibé ita la rezolve problema, tanba foos iha rai-li’ur mós ema nia foos folin sa’e tiha ona, seidauk iha tán espekulasaun kompaña importadór sira malandru tán hanesan iha nasaun Indonézia komesa mosu mafía foos, entaun Governu la konsege kontrola foos folin sa’e tán  kada loron,”  Aniceto Guterres afirma.

Aniceto Guterres hateten  iha Timor-Leste nia situasaun piór liu tanba produsaun  hare iha rai-laran menus tebes, lato’o para atu konsumu, ho kondizaun El-Nino bain-loron sei naruk, ne’e bá oin piór liután.

Nia sujere atu Orsamentu Jeral Estadu 2024 (OJE) mak Governu haree took hodi fó solusaun bá problema sira hanesan ne’e

Jornalista Estajiária : Zita Menezes