Xanana To’o iha Bali Simu ho Parada Militár no Dansa Kulturál

Hatutan.com, (10 Outubru 2023), Bali-Primeiru Ministru, Kay Rala Xanana Gusmão, Tersa (10/10/2023), hale’u tuku 10.00 dadeer, to’o ona iha Aeroportu Internasionál I Gusti Ngurah Rai Denpasar-Bali, hodi partisipa iha Forum Estadu Arkeolójiku ka Archipelagic And Island States Forum (AIS Forum).

Lee Mós: Xanana Semo ho Aero Díli Hodi Partisipa Forum Estadu Arkeolójiku iha Bali

PM Xanana to’o iha Bali, Tersa (10/10/2023). Foto/Rogério Pereira Cárceres

Bainhira tun hosi aviaun, molok tama bá sala VIP, Xefe Governu RDTL ne’e simu ho parada Militár Tentara Nasional Indonézia (TNI) no dansa kulturál Bali nian, hosi estudante sira SMA Negeri 2 Kuta-Bali.

Jornalista Hatutan.com, Rogério Pereira Cárceres, ne’ebé akompaña delegasaun PM Xanana nian bá Bali no hosi Bali relata katak, prezense Xefe Governu Timor-Leste nian iha Denpasar Bali, simu hosi Ministériu Turizmu bá Ekonómia Kreativu nian Xefe Delegasaun Ni Wawan Guru Adnyani, no Embaixadór Timor-Leste bá Repúblika Indonézia, Filomino Aleixo, hodi akompaña bá deskansa minutu balu iha sala VIP.

Molok atu fila bá deskansa iha Otel Samabe Bali Resort, iha liur aredór VIP nian, estudante sira ne’e entuziazmadu ho prezensa Xanana nian, nune’e sira hamriik forma tuir dalan, kaer ho bandeira RDTL ho RI nian, hodi hakilar temi naran “Abo Nana”. Estudante balu mós konsege foto ho PM Xanana hafoin liubá fatin deskansa nian iha Otel Samabe Bali Resort. **