Família afetadu sira bá konstrusaun rezidénsia Autoridade RAEOA, iha área Fulolo, aldeia Sanane, Suku Costa, Sub-Rejiaun Pante Makasar, hala’o konferénsia imprensa hodi ezije indemizasaun. Foto: espesiál.
“Residensia Fulolo nia orsamentu mai husi orsamentu jeral estadu (OJE) ne’ebé kategoria bá fundu espesial dezemvolvimentu ho montante $2.318,489.5 hodi halo konstrusaun. Nune’e reseita husi rezidénsia Fulolo hahú iha tinan 2017 hetan $80,000, 2018 ($70,700.90, 2019 ($407,300), 2020 ($ 11,328.88), 2021 ( $37,700.33), 2022 ($43,39.99) no tinan 2023 ($32,600). Nune’e hamutuk ona $682,659.20 makaEstadu hetan reseita hosi rezidensia Fulolo,” Sekretária Komisaun C, Sancia da Conceição de Araujo haktuir relatóriu fiskalizasaun Komisaun C nian ne’e iha plenária PN, Tersa (17/10/2023).
Komisaun C ne’ebé trata asuntu Finansa Públika liuhosi relatóriu fiskalizasaun RAEOA-ZEEMS espliká mós kona-bá orsamentu reabilitasaun bá rezidénsia Fulolo gastu $15,533.50, tanba tinan 2021 orsamentu reabilitasaun hamutuk $ 13,370 no tinan 2022 orsamentu reabilitasaun hamutuk $200,183.50, tuir lei nu 3/2014 Autonómia Finanseira maka iha dekretu lei estatutu RAEOA maka fó kompeténsia hodi delibera programa hodi halo investimentu bá retornu objetivu atu promove kresimentu dezemvolvimentu ekonomia sosiál hanesan baze bá merkadu tanbá ne’e autoridade RAEOA halo Komusaun uluk bá uma rezidénsia Fulolo ne’e hanesan investimentu ida bá infra-estrutura bá nesesaria dezemvolvimentu RAEOA ho kualidade hodi buka reseita bá RAEOA.
Advertisement
Iha relatóriu fiskalizasaun Komisaun C nian ne’e mós mensiona rezidénsia Fulolo fó aluga bá autoridade sira no rezidénsia Fulolo ne’e komesa fó aluga hahú tinan 2017 primeiru mandatu to’o mai terseiru mandatu iha deliverasaun ne’e hateten katak bele aluga no futuramente bele sosa ida-ne’e maka baze hodi aplika.
Rekomendasaun komisaun C liuhosi fiskalizasaun ne’e maka husu Ministériu Justisa atu halo levantamentu bá dadus relasiona ho rezidénsia Fulolo tanba Komisaun C mós deskobre katak estatutu rai seidauk loos tanba iha tempu levantamentu iha programa sistema Nasionál Kadastrais to’o ohin lori sistema Ministériu Justisa no diresaun Nasionál Teras Propriedades (DNTP) seidauk iha kontinuasaun atu elabora dadus.