Ministériu Saúde Planeia Hola Kama Foun Troka Kama Aat Iha Dentaria HNGV

Hatutan.com, (19 Outubru 2023), Díli—Ministériu Saúde (MS) iha ona planu atu sosa kama foun hodi troka kama aat iha Dentaria Hospitál Nasionál Guido Valadares (HNGV).

Ospitál Nasionál Guido Valadares (HNGV).

Ministra Saúde, Elia Amaral dehan, la’ós atu sosa kama aat ne’e de’it maibé Governu mós iha ona planu annuál atu buka solusaun bá preokupasaun hotu-hotu ne’ebé mosu iha HNGV ho sentru saúde sira.

Lee Mós: Problema Sériu Iha Ministériu Saúde, Lian Hosi Médiku Espesialista Ne’ebé Lian Laek

“Kona-bá kama moras nehan nian, ha’u hanoin diretora ezekutiva bele responde ba ida-ne’e. Maibé, atu dehan katak, Governu iha ona planu atu hola fali kama foun,” Elia Amaral, hateten bá Hatutan.com, hafoin partisipa reuniaun Konsellu Ministru (KM), iha Palásiu Governu, Kuarta  (18/10/2023).

MS sei halo levantamentu prioridade hodi nune’e bele halo asaun annuál no responde kualidade atendimentu bá pasiente sira.

Antes ne’e Ministra Saúde simu ona informasaun kona-bá problema hirak ne’e tanba ne’e maka tau  kedan iha planu annuál ne’ebé besik remata ona.

Antes ne’e jornalista Hatutan.com konsege dada lia ho dentista  sira no sira dehan de’it katak kama rua la funsiona duni iha dentaria no atendimentu la la’o.

Iha arredór HNGV jornalista Hatutan.com mós tenta halo duni entrevista ho pasiente ida ne’ebé foin sai hosi sala dentaria nian, haktuir katak nia atu fokit duni nehan tanba nehan moras maibé labele tanba dentista sira mak haruka nia fila tanba kama la funsiona.

Jornalista: Leopoldina de Carvalho