Ramos-Horta Enkoraza Arábia Saudita Halo Mediasaun bá Problema Israel-Palestina

Hatutan.com, (20 Outubru 2023), Riyadh—Prezidente Repúblika (PR), José Ramos-Horta hanesan Premiadu Nobel bá Pás, enkoraza nasaun sira ne’ebé iha interese liu-liu hanesan Arábia Saudita atu halo mediasaun bá problema entre Israel no Palestina.

Prezidente Repúblika, José Ramos-Horta hasoru-malu ho Primeiru-Ministru (PM) Árabia Saudita Prínsipe Muhammad bin Salman Alu Saud iha Provínsia Riyadh, Otél The Ritz-Carlton, Sesta (20/10/2023). Foto: PR.

“Nu’udár konvidadu iha Arábia Saudita no nu’udár premiadu Nobel bá Pás, ha’u hateten de’it fó apoiu morál bá sira ne’ebé halo esforsu mediasaun atu hetan solusaun. Apoiu morál bá sira tanba ita Timor-Leste mós laiha kualkér papel iha ida-ne’e no situasaun ne’e komplikadu tebe-tebes,” José Ramos-Horta hateten iha Otel The Ritz-Carlton, provinsia Riyadh, Sesta (20/10/2023).

Lee Mós: Arábia Saudita Prontu Fó Empréstimu bá TL Ho Funan Kiik

Ramos-Horta dehan, durante enkontru rona esplikasaun hosi Primeiru-Ministru Arábia Saudita Prínsipe Muhammad bin Salman Alu Saud nian kona-bá problema Israel no Palestina nian.

Premiadu Nobel bá Pas ne’e konsidera katak,  oras-ne’e situasaun rejionál iha mundu, laiha líder seluk ne’ebé iha autoridade no kapasidade di’ak liu Prínsipe Muhammad bin Salman Alu Saud atu mobiliza halo mediasaun ho autór sira seluk komunidade internasionál hodi book no buka solusaun ba problema Israel no Palestina.

“Ita haree Uniaun Europeia agora ne’e problema bo’ot. Problema oin-oin iha Europa, funu Ukránia no Rusia halo situasaun ekonomia Europa mós difísil, Alemaña, Inglatera mós hasoru difikuldade oin-oin no Amérika sei hasoru eleisaun iha tinan oin,” nia dehan.

Tuir Horta nia análize no apresiasaun bá situasaun, laiha rai ida ne’ebé iha kapasidade liu fali Arábia Saudita, hamutuk ho Gulf Cooperation Council hanesan Uniaun Emiradu Árabe no Qatar, ne’ebé iha esperiénsia kle’an no naruk kona-bá mediasaun.

Tanba Arábia Saudita bele halibur nasaun sira Gulf Cooperation Council atu bele haree solusaun ruma bá problema Israel no Palestina.

Enkontru entre Prezidente Repúblika José Ramos-Horta ho Primeiru-Ministru Arábia Saudita Prínsipe Muhammad Bin Salman Alu Saud ne’e akompaña hosi Vise-Ministra Assuntu ASEAN Milena Rangel no delegasaun.

Jornalista: Vito Salvadór