Eleisaun Órgaun Suku Usitasae, Kandidatu Xefe Suku Na’in-Rua Avansa bá Segunda Volta

Hatutan.com, (29 Outubru 2023), Oé-cusse – Eleisaun órgaun suku Usitasae, Postu Administrativu Oe-silo, Rejiaun Administrativu Espesiál Oé-cusse Ambeno (RAEOA) termina ona. Maibé,  kandidatu xefe suku na’in-rua  de’it hosi na’in-neen tenke avansa bá segunda volta tanba na’in-rua ne’e mak elejivel.

Lee Mós: Eleitór Analfabetu Sira iha Suku Usitasae La Vota no Lulun Bulletin Votu Tau Fali De’it bá Urna

Kandidatu xefe suku na’in-rua ne’ebé hakat bá segunda volta, mak Liberato Punef ho Tomas Colo. Eleisaun segunda volta ne’e sei hala’o iha   loron 13 fulan-Novembru 2023.

Pesoál STAE Apoiu Suku (PSAS fó sai rezultadu eleisaun órgaun suku Usitasae, Postu Administrativu Oe-silo, Rejiaun Administrativu Espesiál Oé-cusse Ambeno (RAEOA) , Domingu (29/10/2023). Foto/Lazaro Pereira Quefi

Bazeia rezultadu eleisaun órgaun suku  Usitasae, Sábadu 28 fulan-Outubru 2023, hatudu katak ema ne’ebé mak iha kompeténsia bá segunda volta Liberato Punef ho númeru sorteiu (3) hetan  votu 652  (31.46%) no Tomas Colo ho  númeru sorteiu 5 hetan votu 487  (20.50 %).

Haktuir bá lei órgaun suku númeru 9/2006 hateten, se bainhira la prienxe rekizitu ho votu 51+1 maka avanza segunda volta.

Iha biban ne’e pesoál STAE Apoiu Suku (PSAS),  Antonio do Santos Quefi hato’o agradesimentu no aviza bá komunidade ka apoiante sira hotu katak rezultadu bá kandidatu na’in-neen kompete bá Xefe Suku  Usitasae ne’e rasik hatudu rezultadu ho la prienxe rekizitu ka persentajen la to’o, nune’e tenke bá avansa bá iha segunda volta.

Anúnsiu ofisial hosi Pesoál STAE Apoiu Suku ne’e hala’o iha Sentru Vitasaun Eskola Bázika Filial Binibu Pune, Domingu (29/10/2023).

Kandidatura Xefe suku Usitasae ne’ebé kompete iha eleisaun orgaun suku iha loron 28 fulan-Outubru 2023, mak hanesan;

1. Agustinho da Conceicao Caunan hetan votu 131.
2. Blasco Ulan hetan votu 96.
3. Liberato Punef hetan votu 652.
4. Ricardo Sufa hetan votu 239.
5. Tomas Colo hetan votu 487.
6. Venancio Caunan hetan votus 401.

Votu nulu 63 no branku 3. Total eleitór iha Suku Usitasae hamutuk 2890. Nune’e, votu  ne’ebé validu hamutuk 2002 no la ativu hamutuk 818.

Jornalista : Lazaro Pereira Quefi