PNTL Konsege Assegura Eleisaun Suku Iha Díli

Hatutan.com, (29 Outubru 2023), Díli—Polísia Nasionál Timor Leste (PNTL) munisípiu Díli konsege hala’o seguransa hodi assegura prossesu eleisaun Suku iha munisípiu ne’e ho di’ak no livre hosi violénsia ka asitende ruma.

Membru PNTL destakadu iha Dili assegura hela prossesu eleisaun suku tinan 2023. Foto: PNTL.

“PNTL kontinua assegura no halo seguransa bá prossesu kontajen votus iha kapitál Díli,” Hatutan.com sita komunikadu, Segunda (29/10/2023).

Lee Mós: Eleisaun Órgaun Suku Bahu, Total Eleitór 7.220 Maibé 3.768 Mak Vota

Komunikadu ne’e hateten, durante eleisaun ne’e la’o, Segundu Komandante PNTL Munisípiu Díli, Superintendente Polísia João Sansho Pires hamutuk ho membru destakadu sira mantein seguransa iha sentru votasaun sira.

Alende ne’e, ekipa Komandu Jerál ne’ebé lidera hosi Xefe Departamentu Polisiamentu Komunitáriu Nasionál, Superintendente Polisia António da Luz kontinua apoia seguransa bá iha Komandu Munisipiu Díli.

Maski iha sentru votasaun barak iha Díli laran mak tenke avansa bá Segunda volta to’o kalan boot maibé Polísia kontinua assegura ho sussesu.

“Komandu PNTL kontinua nafatin fó seguransa iha vota daruak tanba komunidade hakarak ezerse sira nia direitu votu,” Komunikadu ne’e hateten.

Ikus liu, durante prossesu ne’e tomak, Komandu Díli rejista hodi informa katak, situasaun kontroladu no hakmatek.

Jornalista: Rogério Pereira Cárceres