Atividade Merkadu Sira iha Díli Sei Menus Komprador

Hatutan.com, (03 Novembru 2023), Díli– Relasiona ho feriadu loron Finadu, 02 fulan-Novembru 2023, abitante sira maioria iha sidade Díli fila bá munisípiu, suku no aldeia ida-idak.

Lee Mós: Abitante sira iha Dili Seidauk iha Konsiénsia Soe Fo’er

Atividade negósiu iha Merkadu Bidau Akadiru-Hun, Díli, Sesta (03/11/2023). Foto/Zita Menezes

Movimentu abitante  sira lubun fila bá munisípiu ne’e  halo Díli kuaze mamuk. Movimentu transporte  privadu no públiku sira la hanesan ona loron bai-bain ne’ebé sempre akontese engarrafamentu iha parte balun liuliu iha área Mandarin nian, Audian,  Bairru Píte  no mós iha Kampu Baru, Comoro nian.

To’o loron 03 fulan-Novembru ne’e, atividade sira iha Díli seidauk la’o normal. Nune’e mós atividade iha merkadu sira iha Díli, hanesan Merkadu Becora, Merkadu Taibessi, Merkadu Comoro, Merkadu Manleuana, Merkadu Delta, no Merkadu iha Kampu Baru nian seidauk  la’o normal.

Negosiante Teresa Gama (63) ne’ebé hala’o atividade iha merkadu Bidau Akadiru-hun, hateten daudaun ne’e produtu lokál, hanesan modo ho ai-fuan sira ne’ebé nia fa’an la folin hanesan loron bai-leet sira liubá tanba laiha komprador.

“Ami fa’an sasán iha ne’e la folin liu, tanba ema bá hotu foho ne’ebé ema hola sasán laiha Ami fa’an modo to’o namlaek de’it tanba laiha ema mak sosa,” Teresa Gama bá Hatutan.com iha nia fatin negósiu  Bidau Akadiru-hun, Díli.

Teresa Gama haktuir modo ne’ebé baibain sira  fa’an ne’e madrugada bá sosa  iha Merkadu Taibessi no iha loron baibain sempre hetan lukru $40.00 to’o $50.00.  maibé dezde kedas ema barak bá munisípiu hodi vota bá eleisaun órgaun suku  iha loron 28 fulan-Outubru 2023 no kontínua bá munisípiu iha loron 31 fulan-Outubru ne’e, halo ema barak la bá sosa modo iha merkadu.

Teresa Gama hala’o atividade negósiu fa’an modo  tinan 20-resin ona no osan hosi rezultadu fa’an modo ne’e maka hodi  sustenta nesesidade família uma-laran ni’an.

Jornalista Estajiária: Zita Menezes