Justisa & Krime
Konfrontu iha Lourba, Na’in-Hitu Kanek no Sunu Uma Haat
Hatutan.com, (03 Novembru 2023), Díli—Konfrontu fízika entre grupu juventude sira ne’ebé akontese, Sesta (03/11/2023), iha Suku Lourba, Postu Administrativu Bobonaro, Munisípiu Bobonaro, rezulta ema na’in-hitu (7) kanek no uma haat hetan sunu, kioske rua (2) ho uma ualu (8) hetan estragu (baku rahun).
Korpu Bombeiru Munisípiu Boonaro halo intervensaun hodi rega uma hirak ne’ebé hetan sunu iha Suku Lourba, Sesta (03/11/2023). Foto/APC
Sita hosi pájina Facebook Autoridade Proteção Civil Timor-Leste, relata katak to’o agora seidauk hatene motivu hosi akontesimentu ne’e no APC rasik sei hein konfirmasaun detallu hosi Komandu APC Munisípiu Bobonaro.
Daudaun ne’e APC Munisípiu Bobonaro halo hela verifikasaun bá uma ne’ebé hetan estragu no sasán sira hodi fó daudaun apoiu emerjénsia.
Vítima sira ne’ebé kanek evakua ona bá halo tratamentu intensivu iha Ospital Referral Maliana.
Tuir dadus APC Timor-Leste nian katak vitima sira ne’e maioria hosi Suku Carabau no dadaun família vitima sira asegura sira nian aan iha sira-nia família.
To’o notísia ne’e publika seidauk hetan konfirmasaun hosi Komandu Polísia Nasionál Timor-Leste (PNTL) Munisípiu Bobonaro.
Jornalista: Leopoldina de Carvalho