PDHJ Sei Loke Investigasaun bá Konfrontu Lourba-Karabau

Hatutan.com, (06 Novembru 2023), Díli—Provedoria dos Direitos Humanos no Justiça (PDHJ) seidauk simu keixa kona-bá kazu konfrontu entre komunidade iha Suku Lourba no Karabau munisípiu Bobonaro, maibé sei loke investigasaun atu haree bá notísia krime hodi haruka bá Ministériu Públiku (MP).

Membru FALINTIL Forsa Defeza Timor Leste (F-FDTL) ho Polísia Nasionál Timor Leste (PNTL) hakalma no halo mediasaun dame bá joven sira iha Suku Lourba no Karabau munisípiu Bobonaro, hafoin akontese konfrontu durante finadu Novembru 2023. Foto: Facebook.

Provedór, Virgílio da Silva Guterres hateten, PDHJ sei loke investigasaun atu hatene situasaun reál iha terrenu no motivu loloos hosi konfrontu entre komunidade iha Suku rua ne’e.

Lee Mós: Konfrontu iha Lourba, Na’in-Hitu Kanek no Sunu Uma Haat

“To’o agora PDHJ seidauk simu keixa ruma no se simu karik mós PDHJ sei follow-up no karik iha buat balun ne’ebé la kondíz ho situasaun real, sei loke investigasaun tanba kompeténsia másimu ne’ebé PDHJ halo ne’e maka investigasaun depois halo notísia krime. Bainhira kazu ne’e involve krime sei haruka bá iha Ministériu Públiku,” Virgílio Guterres hateten iha Ministériu Finansas, Segunda (06/11/2023).

Preokupa ho Atuasaun PNTL

PDHJ sei orienta funsionáriu PDHJ diresaun fiskalizasaun, liu-liu diresaun delegasaun territoriál Maliana ninian atu tau-matan bá atuasaun Polísia Nasionál Timor Leste (PNTL) karik iha essesu ruma hosi intervensaun polísia nian ne’ebé implika violasaun bá direitus umanus.

“Atuasaun polísia nian durante ne’e ita hotu haree katak sai preokupasaun, la’ós de’it intervensaun maibé prezensa polísia hanesan aparellu Estadu nian ne’ebé marka prezensa iha komunidade ne’e mak polísia,” Virgílio Guterres hateten.

Bainhira polísia ne’e mak halo patrulhamentu regulár, prezente iha komunidade nia leet ne’e di’ak,  inisiativa ka ema ne’ebé hanoin atu halo krime ne’e menus tanba polísia iha ne’ebá.

“Kestaun mak ne’e, krime ne’e mosu tiha, konflitu sira ne’e akontese tiha, polísia ba halo intervensaun no atuasaun sira ne’ebé dalaruma ho forsa esesivu. Tanba ne’e ami husu nafatin bá Komandu atu orienta ninia membru sira atu kualkér intervensaun, bá atu mantein órden ne’e kontinua respeita prinsípiu direitus umanus, nune’e problema ne’ebé ita buka rezolve ne’e la hamosu tán problema seluk,” nia preokupa.

Lee Mós: Insidente Lourba Halo Xanana Hirus no Posivel Taka Atividade GAM ho GAR

Jornalista: Vito Salvadór