Pesoál Saúde Barak Lakohi Servisu iha Área Remota

Hatutan.com, (06 Novembru 2023), Díli– Komisaun F Parlamentu Nasionál ne’ebé trata asuntu Saúde, Seguransa Sosiál no Igualdade Jéneru, nota katak pesoál saúde rejeita ka lakohi servisu iha área remota no sira prefere liu servisu iha ospitál nasionál no munisípiu sira.

Lee Mós: Pesoál Saúde 2,276 Rejistu iha Baze Dadus Ministériu Saúde

Responsável Postu Saúde Suku Asulau-Sare, Postu Administrativu Hatulia Zona A, Munisípiu Ermera, doutora Gilberta Soares Martins hala’o konsulta bá pasiente iha aldeia Bermuslau, 31 Outubru 2023. Foto: Cipriano Colo.

“Rekursu umanu kuaze  retira mai hotu iha nasionál, balu tuir fali teste iha ospitál Nasionál Guido Valadares (HNGV), no mós balu husu destaka mai hotu nasionál ne’ebé ami haree postu saúde barak maka falta médiku no rekursu umanus. Agora ambulánsia mós hanesan iha sentru saúde ambulánsia  konsentra iha ne’ebé ambulánsia sira iha sentru saúde ne’e iha ida ka rua, nune’e sentru saúde ne’ebé iha nian postu saúde barak kadaves difikulta sira oinsá transfere pasiénte  ho urjénsia para asesu mai iha sentru saúde ida-ne’e maka situasaun real ne’ebé akontese iha terreñu,” Prezidente Komisaun F PN, Maria Gorumali Barreto haktuir bá Hatutan.com iha PN, Segunda (06/11/2023).

Deputada Maria  Gorumali Barreto mós foti ezemplu hanesan iha Bobonaro iha sentru saúde no postu saúde iha Lolotoe médiku barak maka retira aan mai hotu Díli, no iha Maliana ne’ebé agora rekursu umanus no médiku no parteira iha postu Lolotoe menus.

“Tanba ema hotu hakarak mai hotu nasionál, lakohi iha área rural, maibé kuandu bá texte sira promete katak sira prontu atu deslola iha ne’ebé de’it, maibé kuandu sai tiha funsionariu públiku no kontratadu mai ho razaun oin-oin, hakarak fila hotu mai vila, ida-ne’e maka ha’u hanoin katak  sai asuntu ne’ebé importante bá oin liuliu bá Governu liuhosi Ministériu Saúde (MS) no mós Parlamentu Nasionál atu haree bá asuntu ida-ne’e,” deputada Maria Gorumali Barreto  tenik.

Prezidente Komisaun F PN, deputada Maria Gorumali Barreto mós haktuir ema barak maka tuir rekrutamentu halo juramentu, maibé sira la kumpri tanba bainhira sira hetan tiha servisu la prontu atu koloka iha área remota.

Iha  fiskalizasaun komisaun F PN  nota mós katak pesoál saúde iha postu saúde sira barak maka mai tuir fali kompete bá vaga iha HNGV nian no mós iha razaun seluk maka tanba distánsia dook no kondisaun infra-estrutura ne’ebé ladún di’ak ne’e maka pesoál saúde sira iha postu saúde sira hakarak muda hotu mai munisípiu no mós nasionál.

Jornalista Estajiária: Zita Menezes