Bankada PD Propoin Halo Alterasaun bá Lei Eleisaun Órgaun Suku

Hatutan.com, (07 Novembru 2023), Díli-Bankada Partidu Demokrátika (PD)  iha Parlamentu Nasionál propoin atu halo alterasaun  bá lei eleisaun órgaun suku  artigu 9/2016 ne’ebé ladún fó nia efetivu no implikasaun di’ak iha eleisaun.

Lee Mós: Eleisaun Órgaun Suku Hatudu Programa Governu Loron 120 Falla

Eleisaun órgaun suku, iha Sede Suku Lakumesak, Postu Administrativu Lacló, Munisipiu Manatuto, Sábadu (28/10/2023). Foto/ Rogério Pereira Cárceres.

“Prinsipíu, ita laiha kultura lee, afinál lei eleisaun órgaun suku  hakerek hotu ona iha artigu  9/2016 ne’ebé altera iha 2016 komu ita la lee deputadu sira barak maka la lee, entaun ita ko’alia bazeia de’it bá buat ne’ebé mosu iha terreñu, afinál kona-bá tinta, foto sira no  sasán hirak ne’e prevee hotu ona iha lei,” membru PN hosi Bankada PD Maria Teresa haktuir  bá Hatutan.com iha PN, Tersa (07/11/2023).

Nia dehan, deputadu opozisaun sira barak maka husu tanbasá la halo alterasaun ka dekretu ruma molok halo eleisaun ida-ne’e? nune’e, Deputada Maria Teresa argumenta katak tempu mós badak iha IX Governu, tanba haree iha 2016 hala’o eleisaun suku buat hotu di’ak hela, laiha failansu ida, entaun tanbasá maka lei ne’ebé hanesan iha 2016 uza iha 2023 sai fali fallansu ne’ebé boot demais.

“Ida-ne’e maka ita tenke haree fukun hosi failansu ne’e iha ne’ebé, sé karik aplikasaun lei artigu  9/2016 nian teknikamente ladún efetivu tanba han tempu ne’ebé naruk demais entaun ita bele haree hosi faktu ne’ebé iha ladún efetivu  Parlamentu Nasionál bele altera fila-fali lei ne’ebé ladún efetivu iha nia implikasaun,” Deputada Maria Teresa hateten.

Iha fatin hanesan membru PN hosi Bankada FRETILIN,  António Moniz Calau hateten, PN sei hato’o preokupasaun hirak ne’ebé laloos iha terreñu bá Governu bazeia bá fiskalizasaun ne’ebé PN halo.

“Medida la’ós parlamentu nasionál (PN) maka foti, Governu maka foti no PN haree regra hirak ne’ebé ezekuta iha terreñu ne’e loos ka laloos, entaun preokupasaun ne’ebé PN  foti ne’e bazeia bá faktu ne’ebé deputadu sira halo fiskalizasaun no akompañamentu  iha terreñu liuliu kona-bá prosesu eleisaun, entaun eleisaun ida-ne’e difikulta tebes prosesu partisipasaun komunidade sira nian,” Deputadu António Moniz Calau hateten.

Deputadu António Moniz Calau mós foti  ezemplu eleisaun  foin lalais  ne’e komunidade barak maka bá dader  to’o fali loraik maka foin bele vota entaun iha Munisípiu Díli foin lalais ne’e iha  aldeia balu  ne’ebé maka distintu deputadu sira detekta iha eleisaun to’o madrugada.

“Ho kestaun sira ne’e maka ita preokupa, ita hato’o bá Governu oinsá atu hadi’a mekanizmu eleisaun nian para atu labele akontese iha segunda ronde ne’ebé sei realiza iha loron 13 fulan-Novembru 2023,” Deputadu António Moniz Calau  tenik.

Jornalista Estajiária : Zita Menezes