Gregório Saldanha ‘Mouris’ Kontinua Lidera C12N91 bá Períudu 2023–2028

Hatutan.com, (07 Novembru 2023), Díli—Komité 12 Novembru 1991 (C12N91), nu’udár organizasaun ne’ebé halibur juventude Loriku Asu’ain sira liu-liu sira ne’ebé partisipa direta iha manifestasaun 12 Novembru 1991 iha semitériu Santa Cruz, Díli.

Estrutura C12N91 períudu 2023 – 2028 kompostu hosi, Prezidente Gregório Saldanha ‘Mouris’, Vise Prezidente 1 – Filipe Rodrigues Pereira, Vise Prezidente 2 – Teresinha do Menino Jesus C.A.A ‘Tita’, Sekretáriu Jerál – Anacleto Bento Ferreira no Adjuntu Sekretáriu Jerál- Jaime Francisco de Jesus Soares ‘Ajai’, hala’o juramentu hafoin eleitu iha kongresu da-toluk ne’ebé hala’o iha CCD (07/11/2023). Foto: C12N91.

Organizasaun ida-ne’e unifika joven sira ne’ebé partisipa direta iha manifestasaun ne’e no sei moris to’o ohin loron ho nia natureza sein halo diskriminasaun bá ideolojia, konviksaun polítika, rasa, étniku no relijiaun.

Lee Mós: Komité 12 Novembru Preokupa Konstrusaun Memoriál Masacre Santa Cruz Tarde

Oragnizasaun ne’e konsege finaliza ninia kongresu da-toluk ne’ebé realiza iha loron 6 – 7 Novembru 2023 iha Centor Convenções Dili (CCD), Díli.

Kongressu ne’e hetan partisipasaun másimu hosi delegadu sira mai hosi munisípiu 12 ho reprezentante na’in-10 no Suku 20 iha munisípiu Dili ho nia reprezentante kada suku ema 25 konklui ona hodi eleze estrutura foun bá períudu 2023 – 2028.

“Ho deklarasaun unanimidade hosi 536 kongresista, delegadu sira kontinua fó fiar bá Gregório Saldanha ‘Mouris’ hodi lidera C12N91,” Hatutan.com sita komunikadu.

Kompozisaun estrutura C12N91 bá períudu 2023 – 2028 mak hanesan, Prezidente Gregório Saldanha ‘Mouris’, Vise Prezidente 1 – Filipe Rodrigues Pereira, Vise Prezidente 2 –  Teresinha do Menino Jesus C.A.A ‘Tita’, Sekretáriu Jerál – Anacleto Bento Ferreira no Adjuntu Sekretáriu Jerál- Jaime Francisco de Jesus Soares ‘Ajai’.

Jornalista Estajiária: Zita Menezes