Membru PNTL Ne’ebé Involve GAM-GAR Sei Jura bá Bandeira RDTL

Hatutan.com, (07 Novembru 2023), Díli—Komandu Polísia Nasionál Timor-Leste (PNTL) prontu no hein hela orientasaun atu identifika no buka-tuir membru sira ne’ebé deskonfia involve iha Grupu Arte Marsiál (GAM) no Grupu Arte Rituál (GAR), atu lori bá halo juramentu iha Bandeira lulik Repúblika Demokrátika Timor-Leste (RDTL), iha komemorasaun loron Proklamasaun Independénsia dala-47 iha 28 Novembru tinan ne’e.

Portavóz Komandu PNTL, Superintendente Polísia António da Luz esplika kronolojia akontesimentu memru BOP tiru joven ida iha Bidau Akadiruhun, liu hosi konferénsia imprensa iha Komandu PNTL Caicoli, Segunda (18/09). Foto: PNTL.

Portavós Komandu Jerál PNTL, Superintendente Polísia António da Luz fó-sai promessa ne’e hodi hatán bá deklarasaun Primeiru Ministru (PM), Kay Rala Xanana Gusmão nian, bainhira hala’o vizita urjente bá Kuartél Jerál PNTL iha Caicoli-Dili, Sábadu (04/11/2023).

Lee Mós: Insidente Lourba Halo Xanana Hirus no Posivel Taka Atividade GAM ho GAR

“Ita tenke prontu tanba ne’e orientasaun. Ita espera katak orientasaun ne’e iha tempu badak sei fó bá komandu no sei ezekuta,” Superintendente Polísia António da Luz hatán bá jornalista sira iha Sentru Formasaun Polisia (CFP) Comoro-Díli, Tersa (07/11/2023).

Prezensa Xanana nian iha Kurtél Jerál PNTL  tanba hirus ho kazu konfrontu entre joven sira iha Suku Lourba ho Karabau, Postu Administrativu Bobonaro, Munisipiu Bobonaro, Sesta (03/11/2023) no husu Komandu PNTL atu fó órden hodi halo atuasaun ho rapidamente, nune’e bele evita konflitu sai boot.

Altura ne’ebá, PM Xanana Gusmão deklara katak, sei bolu hotu lider másimu hosi forsa rua ne’e atu identifika no buka-tuir membru sira ne’ebé involve iha GAR-GAR, bá tuir hotu juramentu, iha 28 Novembru.

Jornalista: Rogério Pereira Cárceres