Desportu
Gregório Correia Rezigna Husi Kargu Sekretáriu Jerál FFTL
Hatutan.com, (08 Novembru 2023), Díli- Sekretáriu Jerál Federasaun Futebol Timor-Leste (FFTL), Gregório Correia, deside rezigna an hosi nia kargu ho rajaun laiha ona konfiansa husi membru asosiasaun sira.
Lee Mós: Asosiasaun Futeból 16 Ezije Kongresu Estraordináriu Troka Prezidente FFTL
Karta Rezignasaun SeKJer FFTL, Gregório Coreia. Foto/Repro
Karta Rezignasaun Sekretáriu Jerál FFTL, Gregório Correia nian ne’ebé Hatuta.com asesu ho númeru Ref:_115_/GC-GS/FFTL/X/2023, Dili, 25 Outubru 2023 hato’o direita bá atuál Prezidente FFTL Francisco Martins da Costa Pereira Jerónimo hodi husu rezignasaun.
Iha karta ne’ebé Hatuta.com asesu iha Kuarta, 08 fulan-Novembru 2023, sita Exelénsia Prezidente Federasaun Futeból Timor-Leste (FFTL), bazeia bá asuntu ne’ebé mak temin iha leten mak nia (Gregório Coreia-red) liu husi karta ida-ne’e hakarak hato’o rezignasaun husi pozisaun Sekretáriu Jerál Federasaun Futeból Timor-Leste hahú husi loron 26 fulan-Outubru 2023, Oras 00:01 otl.
Razaun hirak ne’ebé fundamenta Gregorio Correia nia desizaun hodi rezigna-an mak hanesan tuir mai; Depois de Kongresu anuál 2023 FFTL nian ne’ebé akontese iha loron 1 fulan-Jullu tinan 2023, Membru asosiasaun 16 husi total 21 membru, fó votu kontra bá Relatóriu semestre dahuluk atividade FFTL nian no inklui proposta no planu semestere daruak husi tinan 2023 nian.
Relasiona ho asuntu ida ne’e mak membru asosiasaun maioria la-fó ona konfiansa ba Presidente no nia estrutura tomak inklui Gregório Correia hanesan Sekretáriu Jerál FFTL.
“Ha’u nia deskulpa ua’in bá hadomi na’in futeból tomak karik iha ha’u nia mandatu la’o la tuir promesa ne’ebé hato’o bainhira ha’u hetan nomeasaun,”n Gregório Correia hateten iha karta rezignasaun.
Sekretáriu Jerál FFTL, Gregório Correia. Foto/Espesiál
“Mak ne’e de’it, ha’u nia karta hato’o bá exelénsia, ikus liu obrigadu bá kolaborasaun no servisu hamutuk durante ne’e.”
Karta rezignasaun ne’e haruka mós kopia bá iha membru Ezekutivu FFTL, membru Asosiasaun Futeból Munisípiu 14, membru Asosiasaun Profisionál sira (Feto, Futsal, Arbitragem, Treinadór, Juvenil).
To’o notísia ne’e publika, Hatutan.com tenta atu konfirma direta ho Gregório Coreia liuhosi telefónika, maibé Gregorio Correia nia númeru telefónika la ativa.
Jornalista : Vito Salvadór