PN Sei Kria Lei Kódigu Rejistu Sivíl Atu Labele Diskrimina Relijioza Seluk

Hatutan.com, (08 Novembru 2023), Díli– Prezidente Komisaun A Parlamentu Nasionál trata asuntu Lejislasaun no Justisa, Patrocinio Fernandes, hateten Parlamentu Nasionál (PN) iha ona planu atu kria lei kódigu rejistu sivíl hodi labele iha diskriminasaun bá relijioza seluk.

Lee Mós: Governu Halo Diskriminasaun bá Rekoñesimentu Kazamentu Relijioza

Edifísiu Parlamentu Nasionál. Foto: Média PN.

“Artigu 1475 kódigu sivíl ko’alia kona-bá ida-ne’e. Agora ita seidauk iha lei kona-bá kódigu rejistu sivíl, orsida  tama ona iha preokupasaun sira hanesan imi preokupa ne’e, deputadu sira mós preokupa, ami hotu mós preokupa, ne’ebé ami hetan hotu ona informasaun,” Prezidente Komisaun A  PN, Patrocinio Fernandes haktuir bá Hatutan.com iha PN, Kuarta (08/11/2023).

Deputadu Patrocinio Fernandes haktuir PN  sei haree bá faze ida fó uluk prioridade bá lei sira ne’ebé maka direitamente fó responde bá povu nian nesesidade ne’ebé presiza Governu atu halo ida prioridade ne’e.

“La’ós dehan ida-ne’e la prioridade, maibé  entre prioridade ita hili uluk prioridade sira, tama ona iha planu ami mós hein hela tanba ne’e ko’alia kona-bá kódigu rejistu sivíl ne’e ami hakarak mai nu’udár proposta  lei ne’e Governu maka sei lori mai, atu nune’e, bele tau konsiderasaun bá asuntu sira ne’ebé ita-boot sira ko’alia hanesan halo diskriminasaun bá relijioza seluk no viola direitu umanu,” Deputadu Patrocinio Fernandes hateten.

Membru PN ne’e mós haktuir seidauk serteja bainhira maka atu kria lei refere, maibé iha futuru sei kria.

Jornalista Estajiária : Zita Menezes